SİYASƏT
AVSTRALİYA AZƏRBAYCAN TÜRK DOSTLUĞU BİRLİYİ NOVRUZ BAYRAMI MÜNASIBƏTİ İLƏ ŞƏNLİK KEÇİRMİŞDİR
Obörn, 23 mart (AZƏRTAC). Martın 20-də Avstraliya Azərbaycan Türk Dostluğu Birliyi Novruz bayramı münasibəti ilə Obörn şəhərində yerləşən Türk Evində şənlik keçirmişdir.
Yeni Cənubi Uels (YCU) ştatının yerli hakimiyyət naziri xanım Barbara Perri, ahıllar, əlillər və yerli əhali üzrə nazir Pol Cerald Linç, Türk Rifah Assosiasiyasının prezidenti Beşir Karasu, Yeni Cənubi Uels Türk Assosiasiyaları Şurasınn prezidenti Dursun Qandemir, Türkiyə konsulluğunun nümayəndəsi Yusuf Yurt, Obörn şəhər Şurasının məsləhətçisi İzzet Anmak və digər qonaqlar bayram şənliyinə qatılmışlar.
Tədbirin açılış mərasimində Avstraliyanın, Azərbaycanın və Türkiyənin dövlət himnləri səslənmişdir.
Yeni Cənubi Uels Universitetinin tələbəsi Nicat Qasımov Novruz bayramının yaranma tarixindən söz açmış, onun Azərbaycanın əziz bayramlardan biri olduğunu vurğulamışdır.
Digər natiqlər Azərbaycan və Novruz bayramı haqqında xoş sözlər söyləmişlər.
Azərbaycanın milli musiqiləri səslənən tədbirin sonunda iştirakçılar milli mətbəximizin nemətlərindən dadmışlar.
######