DÜNYA
Avstriya pandemiyaya qarşı mübarizədə uğur qazanan ölkələrlə yaxından əməkdaşlıq edəcək
![Avstriya pandemiyaya qarşı mübarizədə uğur qazanan ölkələrlə yaxından əməkdaşlıq edəcək](/files/2020/1/1200x630/15877304345415157267_1200x630.jpg)
Vyana, 24 aprel, AZƏRTAC
Avstriya koronavirus pandemiyasına qarşı mübarizədə uğur əldə etmiş ölkələrlə yaxından əməkdaşlıq edəcək.
AZƏRTAC xəbər verir ki, Federal Kansler Sebastian Kurts həm Avropa, həm də qeyri-Avropa ölkələri ilə təcrübə mübadiləsini dərinləşdirməkdə maraqlı olduqlarını bildirib. Yeni Zelandiya, İsrail, Danimarka, Çexiya, Avstraliya və Yunanıstandan olan həmkarları ilə videokonfransdan sonra Federal Kansler, ilk növbədə, peyvənd maddələri və dərmanlar sahəsində tədqiqatlarda əməkdaşlığın ön planda dayandığını ifadə edib.
Qeyd edilib ki, pandemiyaya erkən və intensiv şəkildə reaksiya verən və böhranı digər ölkələrdən nisbətən yaxşı başa vuran ölkələrin təmsilçiləri videokonfransda həmçinin sosial-iqtisadi həyatı bərpa etmək, iqtisadiyyata təkan vermək və bunlarla eyni zamanda virusun yayılmasını nəzarətdə saxlamaq barədə fikir mübadiləsi aparıblar. Videokonfransda məsul şəxslərin elmi tədqiqatlarla bağlı Vyanada bir araya gəlməsi razılaşdırılıb.
S.Kurts həmçinin qeyd edib ki, bu qrup öz sıralarını virusa qarşı uğurla mübarizə aparan bir sıra ölkələrlə genişləndirə bilər. Qeyd edilib ki, əhali və ya ərazicə kiçik olan bu ölkələrin əsas hədəfləri sırasında böhrandan çıxmaq, peyvənd, dərman preparatları və tibbi avadanlıqlarla təminatda müstəqil fəaliyyəti təmin etmək və supergüclərdən asılı olmamaqdır.
Elgün Niftəli
AZƏRTAC-ın xüsusi müxbiri
Vyana