Avstriyada qadağan olunmuş aksiyada iştiraka görə 1600 nəfərə cəza kəsilib
Vyana, 15 fevral, AZƏRTAC
Dünyanın bir sıra ölkələrində olduğu kimi, Avstriyada da koronavirus pandemiyasına qarşı həyata keçirilən məhdudlaşdırıcı tədbir və karantin qaydalarına etiraz aksiyaları təşkil olunur. Həftəsonu insanların kütləvi şəkildə bir araya gəlməsinin qarşısını almaq üçün Avstriya hökuməti yanvarın sonunda həftəsonu mitinqlərini qadağan edib. Buna baxmayaraq, fevralın ilk həftəsonu Vyana şəhərinin mərkəzində bir neçə min iştirakçının qatıldığı aksiya keçirilib. Hüquq-mühafizə orqanları həmin aksiyada bir qrup təşkilatçını saxlasa da, belə aksiyaların qarşısını daha çox maarifləndirici-preventiv tədbirlərlə almağa çalışır.
AZƏRTAC xəbər verir ki, ötən həftə sonunda Vyanada hökumətin pandemiyaya qarşı fəaliyyətinə etiraz aksiyasına cəhd olub. Bu dəfə təxminən iki minədək aksiya iştirakçısına qarşı hüquq-mühafizə orqanları fərqli münasibət göstəriblər. Aksiyanın təşkilatçısı olan dörd nəfər həbs edilib, 18 nəfərə cinayət iş açılıb. Aksiyanın demək olar ki, digər bütün iştirakçılarına inzibati qaydada cəza kəsilib.
Hökumət əleyhinə olan müxtəlif radikal qruplaşmaların dəstəyi ilə “gəzinti“ adı altında toplaşan kütlənin bu cür cəzalandırılması ölkə mətbuatının diqqətini cəlb edib. Bu mövzuda yazılan məqalələrdə oxşar aksiyalarda iştirak etmək niyyətində olanların növbəti dəfə yaxşı götür-qoy etməli olacağı, ictimai asayişə zərər vuracaq və infeksiyanın artımına yol verə biləcək addımlardan çəkinəcəkləri qeyd edilib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
