Avstriyalı epidemioloq ölkədə koronavirusun üçüncü dalğası barədə xəbərdarlıq edib
Vyana, 11 fevral, AZƏRTAC
Uzunmüddətli sərt karantin qaydalarının tətbiqinə baxmayaraq koronavirusa yoluxmanın artımı və mutasiyaya uğramış variantlarının sürətlə yayılması bir çox ölkələr kimi Avstriyada da pandemiyanın üçüncü dalğası barədə narahatlıqları artırıb.
AZƏRTAC xəbər verir ki, Krems Universitetinin epidemioloqu Qerald Qartlehner mart ayında ölkədə pandemiyanın üçüncü dalğasının baş verə biləcəyi ehtimalı haqqında danışıb. O bildirib ki, son ayların statistikası və proqnozlaşdırılan epidemioloji modellər karantin rejiminin yumşaldılması və ölkədə Böyük Britaniya ştammının yayılmasından sonra infeksiya hallarının artacağını göstərir. Cənubi Afrika Respublikasında aşkarlanan mutasiyanın bu modellərdə yer almadığını qeyd edən epidemioloq mart ayında ölkədə yenidən gərginliyin artacağını proqnozlaşdırıb. O, ölkədə karantin qaydalarının yumşaldılmasını “odla oyun oynamağa” bənzədib və hazırda ölkənin Tirol əyalətində hər iki mutasiyanın yayılmasını yaxın gələcək üçün xəbərdarlıq kimi dəyərləndirib.
Q. Qartlehner rəsmi qurumları vaxt itirməməyə və koronavirusun yeni variantlarının ölkədə yayılmasının qarşısını almaq üçün sərt tədbirlər görməyə çağırıb. Onun sözlərinə görə, yoluxma ocaqlarında regional sərt karantin qaydaları və icbari kütləvi testlər tətbiq edilməlidir. Eyni zamanda, həmin ocaqlar olan ərazilərdəki əhali növbədənkənar vaksinasiya prosesinə cəlb edilməlidir.
Epidemioloq yekunda bildirib ki, tədbirlər görülməsə, pandemiyanın üçüncü dalğası qaçılmaz olacaq və hətta bir sıra ölkələrdə bu dalğa artıq başlayıb. O, buna misal kimi beynəlxalq yardım üçün müraciət etmək məcburiyyətində qalan Portuqaliyanı göstərib və qeyd edib ki, bu ölkədəki vəziyyət pandemiyanın üçüncü dalğasıdır.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
