Ayna Verdiyeva: Britaniya xəstəxanalarında çalışan azərbaycanlı mütəxəssis olmaq böyük məsuliyyətdir
London, 29 noyabr, AZƏRTAC
Həkim (Dr.) Ayna Verdiyeva hazırda İngiltərənin “Stoke Mandeville Hospital”ında revmatologiya və daxili xəstəliklər üzrə senior rezident kimi çalışır. O, 2019-cu ildə başladığı rezidenturanı 2026-cı ildə tamamlayaraq ixtisas üzrə uzmanlıq dərəcəsi alacaq.
Dr. Verdiyeva AZƏRTAC-a müsahibəsində peşəkar karyerasından, Britaniyada həkim kimi çalışma təcrübəsindən və gələcək planlarından danışıb.
-Azərbaycandan Böyük Britaniyaya qədər uzanan bu peşəkar yol necə başladı?
-2010-cu ildə Azərbaycan Tibb Universitetinin Pediatriya fakültəsini bitirib bir il internatura keçdikdən sonra ailə quraraq Böyük Britaniyaya köçdüm. Üç il ərzində tələb olunan imtahanları verərək 2014-cü ildə Ümumi Tibbi Qurumdan (General Medical Council) tibbi lisenziya aldım və 2015-ci ilin fevralında burada həkim fəaliyyətinə başladım.
-Böyük Britaniyada indiyədək hansı xəstəxanalarda çalışmısınız?
-Burada həkimlər təcrübələrini genişləndirmək üçün demək olar ki, hər il müxtəlif xəstəxanalarda çalışırlar. Mən də 2015–2016-cı illərdə Londondakı “Northwick Park Hospital”da, daha sonra 2016–2019-cu illərdə “Luton and Dunstable Hospital”da Baza Tibbi Proqramı (Core Medical Training) üzrə fəaliyyət göstərmişəm. 2019-cu ildən etibarən isə revmatologiya və daxili xəstəliklər üzrə “Thames Valley” dekanlığının rezidenturasındayam. Bu müddətdə Oksforddakı “Nuffield Orthopaedic Centre”, Redinqdə “Royal Berkshire Hospital”, Slouda “Wexham Park Hospital”da işləmişəm və hazırda “Stoke Mandeville Hospital”da çalışıram.
-Böyük Britaniyada ixtisasartırma və MRCP kimi sertifikatları almaq çətin proses sayılır. Siz bu mərhələləri necə keçdiniz?
-Həkimlər hansı ölkədə gəlməsindən asılı olmayaraq imtahanlar verirlər və bu proses yüksək ixtisas mərhələsinə qədər davam edir. İş və ailə ilə yanaşı imtahanlara hazırlaşmaq çətin olsa da, Böyük Britaniyada keçirdiyim 15 ildə təxminən 10 mühüm imtahan vermişəm. İlk olaraq ingilis dilini sərbəst danışıq səviyyəsinə qədər öyrəndim, daha sonra tibbi imtahanların hamısını bir-bir keçdim. Bu mərhələdən sonra imtahan yoxdur, yalnız konfrans və kurslarla elmi biliklərimi genişləndirəcəyəm.
-Britaniyada bir azərbaycanlı qadın həkim kimi çalışmaq sizə hansı hissləri yaşadır?
-Pasiyent və ya həmkarlarım haralı olduğumu soruşanda azərbaycanlı olduğumu böyük fəxrlə deyirəm. Qeyri-ingilis milliyyətli və qadın həkim kimi burada çalışmaq müxtəlif səbəblərə görə asan deyil, lakin yüksək əzm və çalışqanlıqla bu yolu uğurla keçmişəm. Həmkarlarım və pasiyentlərim tərəfindən hörmətlə qarşılanmağım mənə güc verir.
-Beynəlxalq karyera qurmaq istəyən gənc azərbaycanlı həkimlərə nə tövsiyə edərdiniz?
-Gözəl bir atalar sözümüz var: “Niyyətin hara, mənzilin də ora”. Mən universitet illərində xaricdə təhsil arzusunu qurur və bunun yollarını axtarırdım. Qismətimə İngiltərə düşdü və bu yolda uğurla irəliləyirəm. Tələbə və həkimlərimizə imkanları varsa, başqa ölkələrdə təcrübə toplamağı tövsiyə edirəm. Bu yol həm peşəkar, həm də şəxsi inkişaf baxımından çox dəyərlidir. Çətin olsa da, nəticəsi qürurludur. Ən əsası isə gənclər arada bir dayanıb özlərinə təşəkkür etməyi unutmasınlar.
-Revmatologiya sahəsində gələcəkdə hansı tədqiqat və layihələr üzərində işləməyi planlaşdırırsınız?
-Hazırda ən çox maraqlandığım sahə temporal arterit xəstəliyidir. Şöbəmizlə birlikdə bu xəstəliyin diaqnostika və müalicəsini yaxşılaşdırmağın yollarını araşdırırıq. Bununla yanaşı, revmatologiya üzrə rezidentlərin baş nümayəndəsi kimi tələbə və həkimlərin elmi inkişafına dəstək olmağa davam edirəm.
-Sonda həkim kimi ən böyük arzunuz nədir?
-İngiltərədə ən azı beş il uzman kimi işləməyi planlaşdırıram. Topladığım təcrübə ilə gələcəkdə Azərbaycanda revmatologiya üzrə güclü bir kafedra yaradıb komanda şəklində rezidentlər yetişdirmək və ölkəmizdə autoimmun xəstəliklərlə mübarizə aparmaq mənim ən böyük arzumdur.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
