Aynur Kamilqızı: İstəyirəm mənim kimi analar bilsinlər ki, məhdudiyyət həyatın sonu deyil
Bakı, 20 may, AZƏRTAC
“Möcüzə adlı övladım” kitabının əsas ideyası xüsusi qayğıya ehtiyacı olan uşaqların həyatda özlərini reallaşdırmağa və cəmiyyətin tamhüquqlu üzvünə çevrilməyə qadir olduqlarını göstərməkdir.
Bu fikri AZƏRTAC-ın müxbiri ilə söhbətində kitabın müəllifi Aynur Kamilqızı səsləndirib.
Kitabda gənc rəssam Fuadın həyat hekayəsindən, onun inkişaf, təhsil və şəxsiyyət kimi formalaşma yolundan bəhs olunur. Müəllif qeyd edib ki, kitab motivasiya xarakteri və xüsusi uşaqların valideynlərinə dəstək məqsədi daşıyır.
Aynur Kamilqızının sözlərinə görə, Fuad bu gün tanınmış gənc rəssamdır və eşitmə ilə nitq məhdudiyyətləri nə onun, nə də ailəsinin qarşısında maneəyə çevrilib.
“Biz onun bacarıqlarını inkişaf etdirdik və addım-addım bu səviyyəyə gəlib çatdıq. İstəyirəm mənim kimi analar bilsinlər ki, məhdudiyyət həyatın sonu deyil. Belə uşaqlar üçün hər zaman yaşıl işıq yanır”, – deyə o vurğulayıb.
Müəllif qeyd edib ki, inklüzivlik cəmiyyətin yetkinliyinin və tərbiyə səviyyəsinin göstəricisidir. Onun sözlərinə görə, bu gün inkişaf xüsusiyyətləri olan gənclər çalışır, ünsiyyət qurur və hamı ilə bərabər ictimai həyatda fəal iştirak edirlər.
Aynur Kamilqızı, həmçinin Azərbaycanda xüsusi qayğıya ehtiyacı olan uşaqlar üçün əlverişli şərait yaradıldığını vurğulayaraq, bu sahəyə göstərilən diqqət və dəstəyə görə Azərbaycanın birinci xanımı Mehriban Əliyevaya minnətdarlığını bildirib.
O, kitabın xüsusi uşaqlar böyüdən valideynlər üçün ümid və motivasiya mənbəyinə çevriləcəyinə əminliyini ifadə edib.
Bölmənin digər xəbərləri
