AZAD BERLİN UNİVERSİTETİNDƏ AZƏRBAYCAN GECƏSİ KEÇİRİLMİŞDİR
Bakı, 16 iyun (AzərTA). Azərbaycan Respublikası Diasporla İş üzrə Dövlət Komitəsindən bildirmişlər ki, Azad Berlin Universitetində təhsil alan azərbaycanlı tələbələr bu təhsil ocağının beynəlxalq klubunda Azərbaycan gecəsi keçirmişlər. Azərbaycanın Almaniyadakı səfirliyinin dəstəyi ilə təşkil olunan tədbirdə universitetin tələbələri Afət Nəbiyeva və Mədinə Yaqubova ölkəmizin tarixi, mədəniyyəti, iqtisadiyyatı, milli mənəvi dəyərləri barədə ətraflı məlumat vermişlər.
Alman ictimaiyyətinin nümayəndələri ilə yanaşı, əcnəbi tələbələrin də iştirak etdiyi gecədə Azərbaycan haqqında sənədli film nümayiş etdirilmişdir. Tələbələr respublikamız barədə hazırlanmış məlumatları PowerPiont proqramından istifadə etməklə geniş ekran vasitəsilə qonaqlara təqdim etmişlər.
Tədbirdə, həmçinin Azərbaycana aid sual-cavablardan ibarət oyun da təşkil olunmuşdur.
Qonaqlar milli mətbəximizin ləziz nemətlərindən də dadmışlar.
Bölmənin digər xəbərləri
