Azərbaycan Asiya-Avropa Siyasi Forumunun 6-cı iclasında təmsil olunub
Bakı, 2 dekabr, AZƏRTAC
Yeni Azərbaycan Partiyası (YAP) İdarə Heyətinin üzvü, Milli Məclisin Gənclər və idman komitəsinin sədri, Asiya Siyasi Partiyaları Beynəlxalq Konfransı (ICAPP) Asiya Mədəniyyət Şurasının sədri Şahin İsmayılov, “Gələcəyə Körpü” Gənclər İctimai Birliyinin həmtəsisçisi və onun nəzdindəki “InnoHub” Beyin Mərkəzinin ideya müəllifi, Milli Məclisin deputatı Müşfiq Cəfərov, həmçinin YAP Mərkəzi Aparatının Beynəlxalq əlaqələr və humanitar məsələlər şöbəsinin aparıcı məsləhətçisi Məhəmməd Şirinovdan ibarət nümayəndə heyəti Macarıstanın paytaxtı Budapeştdə keçirilən Asiya-Avropa Siyasi Forumunun (AEPF) 6-cı iclasında iştirak edib.
Partiyadan AZƏRTAC-a bildirilib ki, noyabrın 27-də YAP nümayəndə heyəti Əlaqəliliyin Dostları Fondu tərəfindən təşkil olunan və Macarıstanın Avropa İttifaqı işləri üzrə naziri Yanos Bokanın fəxri qonaq qismində iştirak etdiyi rəsmi ziyafətə qatılıb.
Nümayəndə heyəti noyabrın 28-də AEPF-nin “Avrasiyada sülh və demokratiya” mövzusunda 6-cı iclasında iştirak edib. İclasın açılış sessiyasında ICAPP Daimi Komitəsinin üzvü, AEPF-nin həmsədri, Nepal Kommunist Partiyası Mərkəzi Daimi Komitəsinin üzvü Racan Bhattaray, AEPF-nin həmsədri, CEVRO Universitetinin Asiya-Sakit Okean Araşdırmaları Mərkəzinin sədri Yan Zahradil, Macar Vətəndaş İttifaqının (Fides) vitse-prezidenti Kinqa Qal və ICAPP Daimi Komitəsinin sədri Çunq Eu-yonq çıxış ediblər. ICAPP-ın Baş katibi Oh Sonqun təqdimatında AEPF-nin fəaliyyət qaydalarına dəyişikliklərin olunmasından və AEPF Bürosunun yeni tərkibinin seçilməsindən sonra iclas plenar sessiyalarla davam edib.
Ş.İsmayılov ikinci plenar sessiyada çıxış edərək, Azərbaycanın Cənubi Qafqazda sülhün və dayanıqlı inkişafın təminində mühüm rol oynadığını bildirib. Deyib ki, ərazi bütövlüyünün bərpasından sonra Azərbaycan yenidənqurma, reinteqrasiya və regional əməkdaşlıq mərhələsinə daxil olub, Avrasiyada enerji-nəqliyyat qovşağı kimi regional və qlobal proseslərdə fəal iştirak edir. Vurğulanıb ki, Azərbaycanın baxışı dinc və bağlantılı Avrasiyadır. Ölkəmiz Şərq və Qərb tərəfdaşları ilə bu gələcəyi qurmağa hazırdır. Zəngəzur dəhlizi Avrasiya üçün yeni nəqliyyat və əməkdaşlıq imkanları yaradan sülh layihəsi kimi qiymətləndirilir. Vaşinqtonda sülh sazişinin paraflanması beynəlxalq dəstəyi göstərir, Prezident İlham Əliyevin diplomatik fəaliyyəti isə proseslərdə həlledici rol oynayıb. O, həmçinin qeyd edib ki, Azərbaycanın çoxpartiyalı siyasi sistemi sülhə və demokratik inkişafa töhfə verir, siyasi qüvvələrin birliyi institutları gücləndirir. Ölkəmizin sülh yanaşması qlobal xarakter daşıyır və ölkə Qoşulmama Hərəkatı, BMT və digər platformalarda sülh və ədaləti fəal təşviq edir.
Bağlanış sessiyasında müzakirələrin əsas nəticələrini özündə əks etdirən Budapeşt Bəyanatı qəbul olunub.
AEPF-nin 6-cı iclasına paralel olaraq, Macarıstanın Xristian Demokrat İnstitutu Fondunun təşkilatçılığı ilə “Dialoq və əməkdaşlığın gücləndirilməsi” mövzusunda beyin mərkəzlərinin görüşü keçirilib. M.Cəfərov tədbirdə çıxışında Gəncə və ətraf regionlarda gənclərin təhsilini, peşəkar inkişafını dəstəkləyən müasir innovasiya və analitik platforma - “InnoHub” Beyin Mərkəzinin fəaliyyətini təqdim edib. O bildirib ki, “InnoTalks”, ideya sessiyaları və müxtəlif icma təşəbbüsləri gənclərə əməkdaşlıq imkanı yaratmaqla yanaşı, fikir mübadiləsi, praktik bacarıqlar və uzunmüddətli uğur üçün vacib keyfiyyətlərin inkişafına şərait yaradır.
Günün sonunda iştirakçılar Macarıstan Milli Assambleyasının Sədri Laszlo Köverin adından verilən rəsmi ziyafətə də qatılıblar.
Səfər çərçivəsində iştirakçılar Macarıstan Musiqi Evini də ziyarət ediblər.
Bölmənin digər xəbərləri
