AZƏRBAYCAN AVARÇƏKƏNİ DÜNYA KUBOKU UĞRUNDA TURNİRİN KANOE YARIŞLARINDA FİNALA ÇIXMIŞDIR
Macarıstanın Zeqed şəhərində kayak və kanoe qayıqlarında avarçəkmə üzrə dünya kubokunun birinci mərhələsi başlanmışdır. Bir nəfərlik kanoe qayıqları üzrə yarışlarda Azərbaycan idmançısı Valentin Demyanenko 200 metr məsafəni 41,018 saniyəyə qət edərək öz yarımqrupunda 8 idmançı arasında birinci yeri tutmuşdur.
Azərbaycan Milli Avarçəkmə Federasiyasından AZƏRTAC-a bildirmişlər ki, yarışın reqlamentinə əsasən, V.Demyanenko 9 idmançının mübarizə aparacağı finala birbaşa vəsiqə qazanmışdır.
Digər yarımqrupda isə daha bir Azərbaycan avarçəkəni Aleksandr Kasatkin 43,343 saniyə nəticə ilə 8 idmançı arasında beşinci olmuşdur. A.Kasatkin iyunun 6-da yarımfinal mərhələsində çıxış edəcəkdir. Bu mərhələdə idmançımız 9 iştirakçı arasında ilk “üçlüy”ə düşəcəyi təqdirdə finala vəsiqə qazanacaqdır.
Qeyd edək ki, 34 ölkənin iştirak etdiyi yarışda Azərbaycan idmançıları ilk dəfə mübarizə aparırlar.
Bölmənin digər xəbərləri
