AZƏRBAYCAN AVARÇƏKƏNLƏRİ DÜNYA KUBOKUNUN BİRİNCİ MƏRHƏLƏSİNDƏ ÇIXIŞLARINI DAVAM ETDİRİRLƏR
Macarıstanın Seqed şəhərində kayak və kanoe qayıqlarında avarçəkmə üzrə dünya kubokunun birinci mərhələsi davam edir.
Azərbaycan Milli Avarçəkmə Federasiyasının mətbuat xidmətindən AZƏRTAC-a bildirmişlər ki, iyunun 6-da Azərbaycan idmançıları 200 metr məsafəyə yürüşdə iştirak etmişlər.
Kanoeçimiz Aleksandr Kasatkin 45,427 saniyə nəticə ilə 9 iştirakçı arasında 5-ci olmuşdur. Bu nəticə idmançımızin finala yüksəlməsinə imkan verməmişdir. Kayakçıların mübarizəsində isə Fikrət Zeynalov eyni məsafəni 45,538 saniyəyə qət etmişdir. Nəticədə öz yarımqrupunda 9 iştirakçı arasında 8-ci olan F.Zeynalov da finala vəsiqə qazana bilməmişdir.
İkinəfərlik qayıqlarda isə Fikrət Zeynalov-Elmar Məmmədov dueti yarışa qatılmamışlar. Buna səbəb qoşa qayıqlarda mübarizənin F.Zeynalovun fərdi çıxışından cəmi 15 dəqidə sonraya təsadüf etməsi olmuşdur. Bu idmançılar birgə mübarizəni iyunun 7-də 500 metrlik məsafəyə yürüşdə davam etdirəcəklər.
Qeyd edək ki, 35 ölkənin qatıldığı Dünya Kubokunun mərhələ yarışında kanoe qayıqlarında yalnız kişilər, kayak qayıqlarında isə həm kişi, həm də qadınlar mübarizə aparırlar. Azərbaycan avarçəkənləri kişilərin yarışında iki kayakçı və iki kanoeçi ilə təmsil olunur. Artıq kanoeçimiz Valentin Demyanenko həm 200, həm də 500 metr məsafəyə yürüşdə finala vəsiqə qazanmışdır.
Bölmənin digər xəbərləri
