Azərbaycan Cənubi Qafqazın sülh və əməkdaşlıq məkanına çevrilməsində mühüm təşəbbüslərlə çıxış edir - ŞƏRH
Bakı, 22 sentyabr, AZƏRTAC
Azərbaycan hər zaman regionumuzda sülh və əməkdaşlığın tərəfdarı olsa da, Ermənistan bunun əksini nümayiş etdirib. Otuz il davam edən danışıqlar prosesinə baxmayaraq, Ermənistan işğal etdiyi torpaqlarımızı sülh yolu ilə geri qaytarmadı. Buna görə də 2020-ci ildə 44 günlük Vətən müharibəsində dövlətimiz öz gücü ilə ərazilərimizi azad etdi. Bu müharibədə erməni ordusu darmadağın edildi, rəsmi İrəvan kapitulyasiyaya imza atmağa məcbur oldu. Buna baxmayaraq, qalib Azərbaycan bölgənin gələcək rifahı naminə Ermənistana sülh sazişi imzalamağı təklif etdi. Lakin qarşı tərəf ona uzanan sülh əlini qəbul etməyərək, müxtəlif bəhanələrlə prosesi uzadıb. Eyni zamanda, Ermənistanın işğal vaxtı Qarabağda yaratdığı qanunsuz rejim də dövlətimizə “əzələ” nümayiş etdirməyə çalışıb, davamlı olaraq hərbi təxribatlar törədilib. Azərbaycanın sülh çağırışına adekvat reaksiya verilməməsinin acı nəticələrini artıq Ermənistan və qanunsuz rejim hiss edir. Şanlı Ordumuzun Qarabağda 24 saat ərzində keçirdiyi antiterror tədbirləri nəticəsində erməni silahlıları təslim oldular.
Bu sözləri AZƏRTAC-a açıqlamasında Milli Məclisin deputatı, YAP İdarə Heyətinin üzvü Pərvin Kərimzadə deyib.
O bildirib ki, sentyabrın 20-də Müzəffər Ali Baş Komandan, Prezident İlham Əliyev uğurlu antiterror tədbirləri ilə əlaqədar xalqa müraciət etdi. Dövlətimizin başçısı müraciətində önəmli məqamlara toxunub. 24 saatlıq lokal antiterror tədbirləri zamanı da mülki insanların qorunması məsələsi ən mühüm prioritetlərdən biri kimi qarşıya qoyulmuşdu. Prezident İlham Əliyevin xalqa müraciətində dediyi kimi, əməliyyat başlamazdan əvvəl bütün hərbi birləşmələrimizə bir daha ciddi tapşırıq verib ki, aparılan antiterror tədbirləri nəticəsində Qarabağ bölgəsində yaşayan erməni əhalisi zərbə altına düşməməlidir və mülki əhali qorunmalıdır. Bu, Azərbaycan humanizminin növbəti nümayişidir. Azərbaycan dövləti bütün addımlarında beynəlxalq hüquqa, humanizm prinsiplərinə, demokratik ənənələrə, beynəlxalq konvensiyalara əsaslanır. Humanizm və insanpərvərliyə əsaslanan dövlət siyasəti isə bugünkü uğurlarımızda böyük rol oynayır. Bu, Azərbaycanın tolerant və multikultural həyat tərzinin təcəssümüdür ki, Qarabağın erməniəsilli sakinləri bunun növbəti dəfə əyani şəkildə şahidi oldu.
Deputatın sözlərinə görə, bir zamanlar Azərbaycanla “şərt dili ilə danışan” Ermənistan artıq Qarabağın Azərbaycan ərazisi olduğunu etiraf edir. Təbii ki, bu məsələdə 44 günlük müharibədə qazanılan Qələbənin, “dəmir yumruğ”un payı böyükdür. Prezident İlham Əliyevin dediyi kimi, Qarabağ Azərbaycan ərazisidir və bunu bütün dünya tanıyır, o cümlədən Ermənistan rəhbərliyi artıq bunu başa düşüb. Əgər vaxtilə “Qarabağ Ermənistandır və nöqtə” deyirdisə, indi “Qarabağ Azərbaycandır” deyir və nəinki deyir, hətta bizim ərazimizin ölçülərini də dilə gətirməyi unutmur.
“Antiterror tədbirləri nəticəsində respublikamızın suverenliyi tam təmin olunub. Qanunsuz rejim dövlətimizin tələblərini qəbul edərək tərk-silah olunmağa məcbur oldu. Artıq Ermənistana məxsus hərbi birləşmələr ərazimizdən çıxarılır. Qanunsuz rejimin silahları isə təhvil alınır. Digər vacib məqam isə Qarabağın erməni sakinlərinin Azərbaycan Konstitusiyası çərçivəsində reinteqrasiya prosesinə başlanılmasıdır. Artıq bu istiqamətdə Yevlax şəhərində ilk görüş keçirildi. Görüşün müsbət atmosferdə keçdiyi bildirilir. Kriminal xunta rejimi təslim olandan sonra bu gərginlik mənbəyi, bu zəhər yuvası artıq tarixdə qalır və Qarabağda yaşayan erməni əhalisi də nəhayət, rahat nəfəs ala bilər”, - deyə Pərvin Kərimzadə vurğulayıb.
Onun sözlərinə görə, Azərbaycan Cənubi Qafqazın sülh, təhlükəsizlik və əməkdaşlıq məkanına çevrilməsi üçün mühüm təşəbbüslərlə çıxış edir. Lakin regionda marağı olan dairələr buna əngəl olmağa çalışırlar. “Bu barədə fikirlərini ifadə edən dövlətimizin başçısı deyib ki, həmin qüvvələr regionumuzdan əl çəkməlidir. Çünki biz sülh şəraitində yaşamaq istəyirik”, - deyə deputat əlavə edib.
Bölmənin digər xəbərləri
