Azərbaycan DİM-lərin Təkmilləşdirilməsi üzrə Milli Öhdəlik sənədini təqdim edən 32 ölkədən biridir
Bakı, 24 oktyabr, AZƏRTAC
Bu ilin sentyabr ayında BMT Baş Assambleyasında keçirilən DİM üzrə Zirvə toplantısı çərçivəsində Azərbaycan DİM-lərin Təkmilləşdirilməsi üzrə Milli Öhdəlik sənədini təqdim edib. Ölkəmiz dünyada bu sənədi təqdim edən 32 ölkədən biridir.
AZƏRTAC xəbər verir ki, bu barədə iqtisadiyyat nazirinin müavini Sahib Məmmədov oktyabrın 24-də Bakıda keçirilən “2023-cü il Qlobal Dayanıqlı İnkişaf Məqsədləri (DİM) Sammitinin Nəticələri və DİM-lərin həyata keçirilməsində Ali Audit Qurumlarının rolu” mövzusunda 3-cü DİM Dialoqunda deyib.
O bildirib ki, sözügedən sənəddə Azərbaycanın 2022-2026-cı illər üzrə sosial-iqtisadi inkişaf strategiyasında müəyyən edilmiş hədəfləri, eyni zamanda, “yaşıl” transformasiya, sosial və iqtisadi inklüzivliyə dair birinci və ikinci DİM dialoqlarının nəticələri əks olunub.
"Zirvə toplantısının nəticələrinə əsasən qəbul edilən siyasi bəyannamə 2030-cu ilə qədər DİM-lərə nail olmaq üçün yeni yol xəritəsi rolunu oynayır. Bu bəyannamə ilə DİM-lərə nail olunmasının gücləndirilməsinin əhəmiyyəti bir daha vurğulanır. Belə ki, 2030 Gündəliyinin icrasının yarısında olmağımıza baxmayaraq, dünyada DİM-lərə nail olunması üzrə proses çox asta gedir, hətta bəzi hədəflər üzrə vəziyyət Dayanıqlı İnkişaf Gündəliyinin qəbul olunduğu 2015-ci ilin baza göstəricisindən aşağı səviyyədədir. BMT Baş katibinin 2023-cü il DİM hesabatında qeyd olunduğu kimi, bu gün hədəflərin yalnız 15 faizi müvəffəqiyyətlə icra olunur", - deyə nazir müavini qeyd edib.
Bölmənin digər xəbərləri
