Bakı, 2 oktyabr, AZƏRTAC

Legioner həyatı yaşayan azərbaycanlı futbolçular ötən həftə öz klublarında növbəti oyunlarını keçiriblər.

AZƏRTAC xəbər verir ki, Türkiyənin “Hatayspor” komandasında çıxış edən Renat Dadaşov Superliqanın VII turunda “Sivasspor”la səfər matçının iştirakçısı olub. Qolsuz yekunlaşan görüşün 60-cı dəqiqəsində meydana çıxan 24 yaşlı hücumçu qol və ya məhsuldar ötürmə ilə yadda qalmayıb.

“Adana Demirspor”un formasını geyinən Azərbaycan millisinin qapıçısı Şahruddin Məhəmmədəliyev isə komandasının evdə “Alanyaspor”u 4:0 hesabı ilə darmadağın etdiyi qarşılaşmanı ehtiyat oyunçular skamyasından izləyib.

“Yurqorden” klubunun forvardı Musa Qurbanlı İsveç çempionatının XXV turunda “Halmstad”a qarşı oyuna start heyətində başlayıb. O, Stokholm təmsilçisinin 1:0 hesabı ilə qalib gəldiyi matçda sonadək əvəzlənmədən oynayıb.

Zaqreb “Dinamo”sunun şərəfini qoruyan Mahir Emreli Xorvatiya çempionatında məğlubiyyət acısı yaşayıb. Onun komandası IX turdan təxirə salınmış qarşılaşmada “Hayduk”a 0:1 hesabı ilə uduzub. Meydana start heyətində çıxan 26 yaşlı hücumçu iki epizodda qola yaxın olsa da, fərqlənə bilməyib. Əvəzində isə 25-ci dəqiqədə sarı vərəqə ilə cəzalanıb. M. Emreli 61-ci dəqiqədə əvəzlənərək meydanı tərk edib.

“Buriram Yunayted”də çıxış edən Azərbaycan millisinin digər üzvü Ramil Şeydayev isə ötən tur istirahət edib. Buna Buriram təmsilçisinin Asiya Çempionlar Liqasına görə “Banqkok Yunayted”lə çempionat görüşünün təxirə salınması səbəb olub.

Vüsal İsgəndərlinin oynadığı Albaniya “Eqnatiya”sı ötən tur evdə gözlənilmədən “Teuta”ya uduzub. Azərbaycanlı vinger 88 dəqiqə meydanda olub.

Türkiyənin II Liqasında “Tuzlaspor”un formasını geyinən Bəxtiyar Həsənalızadə doğma meydanda “Şanlıurfaspor”la 1:1 hesablı heç-heçə etdikləri VII tur oyununda start heyətində meydana çıxıb və sonadək mübarizə aparıb.

Yığmanın müdafiəçisi Anton Krivotsyuk Cənubi Koreyanın “Tedjon Hana Sitizen” komandasının heyətində “Kanvon”a qarşı 90 dəqiqə oynayıb. Görüş 1:1 hesablı bərabərliklə yekunlaşıb.

Nəhayət, Almaniyanın “Dinamo” (Berlin) komandasının formasını geyinən Azərbaycan millisinin sabiq hücumçusu Rüfət Dadaşov Şimal-Şərq Regional Liqasında het-trik müəllifi olub. Renat Dadaşovun qardaşı səfərdə “Çemnitser”i 4:0 hesabı ilə məğlub etdikləri görüşdə 3 qol vurub.