İDMAN
Azərbaycan Güləş Federasiyasının uğurları
Güləşçilərimiz Olimpiya Oyunlarına vəsiqələri bu ilin may ayında Bolqarıstanın Samokov şəhərində keçirilən Avropa çempionatında əldə edib. Sərbəst güləşçilərimiz 3 çəkidə, yunan-Roma güləşçilərimiz və qadın güləşçilərimiz isə hər biri 2 çəki dərəcəsində Olimpiya Oyunlarına lisenziya qazanıb. Beynəlxalq Güləş Federasiyasının (FİLA) reqlamentinə əsasən, hər ölkə Olimpiadaya sərbəst və yunan-Roma güləş növlərində maksimum 2, qadın güləşində isə 1 idmançı ilə qatıla bilərdi.
Ölkəmizi sərbəst güləş yarışlarında Teymur Məmmədov (63 kq) və İqbal Hacızadə (100 kq), qadın güləşçilərin yarışında Leyla Qurbanova (52 kq), yunan-Roma güləşi üzrə yarışlarda isə Cabbar Nəcəfov (50 kq) və İslambek Dadov (69 kq) təmsil ediblər.
Güləşçilərimizin hər biri inamlı mübarizə aparıb və onlardan 3-ü qızıl, 2-si gümüş medal qazanmaqla Azərbaycanın güləş ölkəsi olduğunu bir daha sübut ediblər. Qazanılan bu uğur ölkəmizdə idmana, xüsusilə güləş idman növünə ən yüksək səviyyədə diqqətin və qayğının bariz nümunəsidir. Azərbaycan dövlətinin başçısı, Milli Olimpiya Komitəsinin prezidenti İlham Əliyev həmişə mötəbər yarışlardan əvvəl və sonra idmançılarla görüşündə onlara tam etimad göstərildiyini və hər cür şəraitin yaradıldığını bildirir. Qazanılan bu uğurlar güləşçilərin ölkə rəhbərliyi tərəfindən göstərilən yüksək etimada sədaqətinin nəticəsidir.
Güləş yarışlarının ilk günündə mübarizə aparan yunan-Roma güləşçilərimiz Cabbar Nəcəfov (50 kq) və İslambek Dadov (69 kq) finaladək inamla irəliləyiblər. Finalda rəqibindən üstün olan İslambek Dadov qızıl medal qazanıb və Olimpiya çempionu olub. Cabbar Nəcəfov isə gümüş medal ilə kifayətlənib.
Yeniyetmə qızların mübarizəsində təmsilçimiz Leyla Qurbanova (52 kq) finaladək inamla güləşib. Ancaq final görüşündə Yaponiyadan olan rəqibinə uduzub.
Həm Olimpiya Oyunlarının, həm də elə güləş yarışlarının son günündə mübarizəyə sərbəst güləşçilər qoşulublar. Teymur Məmmədov (63 kq) və İqbal Hacızadə (100 kq) həm yarımqrup, həm də final görüşlərində uğurla çıxış edərək ölkəmizə bir gündə 2 qızıl medal qazandırıblar.
Xüsusilə qeyd etmək lazımdır ki, Olimpiya çempionlarımız keçirdikləri görüşlər ərzində rəqiblərinə cəmi 1 xal veriblər. Belə ki, İslambek Dadov bütün görüşlərini 13:0, Teymur Məmmədov 39:0, İqbal Hacızadə isə 31:1 hesablı qələbələrlə başa vurublar.
Qeyd edilməli olan daha bir məqam isə, sərbəst növdə mübarizə aparan güləşçimiz Teymur Məmmədovun bu il iştirak etdiyi bütün mötəbər yarışlarda fəxri kürsünün ən yüksək pilləsində qərarlaşmasıdır. Belə ki, 2014-cü il ərzində qatıldığı Avropa və dünya çempionatları, həmçinin Olimpiya Oyunlarında qızıl medal qazanan güləşçimiz ona bəslənilən bütün ümidləri doğruldub.
Yeniyetmə güləşçilərimizin Olimpiya Oyunlarında qazandıqları bu nailiyyət, bütövlükdə Azərbaycan Güləş Federasiyasının sistemli və düzgün istiqamətli fəaliyyətinin nəticəsi olmaqla yanaşı, Azərbaycan güləşinin gələcəyinin etibarlı əllərdə olduğunun göstəricisidir.