QAN YADDAŞI
AZƏRBAYCAN HƏQİQƏTLƏRİNİN DÜNYA TƏRƏFİNDƏN QƏBUL OLUNMASI ERMƏNİLƏRİ CİDDİ TƏŞVİŞƏ SALMIŞDIR
Bakı, 24 fevral (AZƏRTAC). Xocalı faciəsinin növbəti ildönümünün yaxınlaşması erməniləri əməlli-başlı təşvişə salmışdır. Onlar Azərbaycanın bu şəhərində törətdikləri soyqırımını ört-basdır etmək və dünya ictimaiyyətini çaşdırmaq məqsədilə faciəyə başqa don geyindirmək kampaniyasına başlasalar da, niyyətləri puça çıxır.
Elə, fevralın 23-də də Azərbaycanın Los-Ancelesdəki baş konsulluğunda Xocalı soyqırımının 17-ci ildönümü ilə bağlı keçirilən tədbirə mane olmaq istəyən ikiüzlü ermənilər bu dəfə də heç nəyə nail ola bilməmişlər.
Azərbaycanın Los-Ancelesdəki baş konsulluğunun konsulu Elman Abdullayev AZƏRTAC-a bildirmişdir ki, tədbir başlayan ərəfədə 50-60 erməni binanın qabağına toplaşaraq, etiraz aksiyası keçirmişlər. Yalanlarını doğru kimi qələmə verməklə dünya ictimaiyyətini çaşdırmaqda mahir olan və əlləri yüzlərlə dinc Xocalı sakininin qanına batmış ermənilər bu tədbirə möhkəmcə əsəbləşmişdilər. Buna baxmayaraq, biz tədbirimizi yüksək səviyyədə keçirdik və bir daha bəyan etdik ki, həmişə başqalarına böhtanlar atmağa öyrəşmiş ermənilər bütün dünyada böyük əks-səda doğurmuş, XX əsrin qanlı səhifəsini təşkil edən Xocalı soyqırımı ilə bağlı cinayətlərini ört-basdır etmək üçün insanlığa yaraşmayan əməllərini davam etdirirlər.
Konsul E.Abdullayev demişdir ki, ermənilərin artıq hücum xarakteri almış Azərbaycan təbliğatından narahat olmalarının əsası vardır. Azərbaycan artıq ötən əsrin 90-cı illərində infomasiya blokadasına alınmış Azərbaycan deyildir. Azərbaycanın Cənubi Qafqaz bölgəsinin lider dövlətinə çevrilməsi, güclü iqtisadi qüdrətə malik olması, dünyanın inkişaf etmiş ölkələrinin iqtisadiyyatına inteqrasiya etməsi beynəlxalq aləmə yaxşı məlumdur. Azərbaycanın dünyada gündən-günə artan nüfuzu və lobbiçilik işinin güclənməsi ermənilərin kürkünə birə salmışdır. Erməniləri vahimələndirən də məhz bu real həqiqətlərdir.