AZƏRBAYCAN MƏDƏNİYYƏT MƏRKƏZLƏRİ ASSOSİASİYASI QADINLARI TƏBRİK ETMİŞDİR
Daşkənd, 7 mart (AZƏRTAC). Daşkənddəki Azərbaycan Mədəniyyət Mərkəzləri Assosiasiyası (AMMA) Beynəlmiləl Mədəniyyət Mərkəzində (BMM) 8 Mart - Beynəlxalq Qadınlar Günü münasibətilə mərasim keçirmişdir.
Tədbirdə paytaxtda yaşayan azərbaycanlı qadınlar, eləcə də digər xalqların nümayəndələri, jurnalistlər iştirak etmişlər.
BMM-in sədri Nəsrəddin Məhəmmədiyev, AMMA-ın sədri Akif Ağatalıbov qadınları təbrik etmiş, uşaqların - gələcək nəslin tərbiyəsində, cəmiyyətin inkişafında qadınların rolundan danışmışdır. Bildirilmişdir ki, qadınlar yaşadıqları cəmiyyətin ictimai-siyasi, sosial, mədəni və digər sahələrinin inkişafına təkan verirlər. Assosiasiyanın üzvlərindən Almaz Məcidova, Nazlı Pirməmmədova və başqaları qadınlarımızın cəmiyyətdəki rolundan və mövqeyindən danışmışlar.
Sonra qadınlara çiçək dəstələri, hədiyyələr təqdim olunmuşdur.
Daşkənddə tanınan müğənni Rəna Əzizova, “Azəri qızları” uşaq rəqs ansamblı xalq mahnılarını və rəqslərini ifa etmişlər.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
