Azərbaycan Mərkəzi Avropa qaz bazarına daxil olur - ŞƏRH
Bakı, 16 yanvar, AZƏRTAC
2026-cı ilin yanvar ayından etibarən Azərbaycan qazı digər ölkələrlə yanaşı, Avstriya və Almaniyadan olan alıcılara təchiz edilir. İtaliya üzərindən Avstriya və Almaniyaya həyata keçirilən qaz təchizatı Azərbaycan qazının Avropadakı coğrafi əhatəsini daha da genişləndirir. Beləliklə, Azərbaycan qazını alan ölkələrin sayı 16-ya çatıb.
Neft Araşdırmaları Mərkəzinin rəhbəri İlham Şaban mövzu ilə bağlı AZƏRTAC-a açıqlamasında bildirib ki, Azərbaycan qazının Avstriya və Almaniyaya tədarükünə başlanması, ilk növbədə Avropadakı istehlakçıların yeni qaz mənbələrindən istehlaka ehtiyacının olduğunun göstəricisidir.
“Çünki ötən ilin dekabrında Avropa Komissiyası yaxın iki il ərzində Rusiya qazından tamamilə imtina etmək haqqında qərar çıxardı. Bu ölkələrə digər mənbələrdən özlərinin qaz təminatı ilə bağlı imkanlar lazımdır. Buna görə də, bu iki ölkənin diqqətinin Azərbaycan üzərində fokuslanması heç də təsadüfi deyil. Çünki Azərbaycan ötən illər ərzində Avropa bazarında qaz tədarükünü mərhələli şəkildə artıraraq istehlakçıların rəğbətini qazanıb və qaz bazarında bu inamı doğruldan etibarlı oyunçu kimi mövqeyini möhkəmləndirib. Bu baxımdan, Azərbaycanla əməkdaşlıq başa düşüləndir və bu, Azərbaycana verilən qiymətdir”, - deyə o qeyd edib.
İ.Şaban əlavə edib ki, 2025-ci il iyunun 10-da SOCAR ilə Almaniyanın SEFE (Securing Energy for Europe) dövlət enerji şirkəti arasında da təbii qaz alışı üzrə 2035-ci ilədək müqavilə imzalanıb: “İllik tədarük həcmi mərhələli şəkildə artırılaraq 15 terevatt–saata, yəni, təxminən 1,5 milyard kubmetrə çatdırılacaq. Bundan əvvəl isə “Şahdəniz” yatağından Almaniyanın “Uniper” şirkəti ildə 1,5 milyard kubmetr qazın alıcısı qismində özünü göstərib. Həmçinin İtaliya da qaz alır və Avstriya ilə Almaniyaya da ixrac İtaliya üzərindən həyata keçiriləcək. Azərbaycan əvvəl Cənubi Avropa, Balkan, Şərqi Avropa ölkələrinin qaz təchizatında iştirak edən aktiv oyunçulardan biri idisə, indi Azərbaycan ixrac coğrafiyasını Avropa bazarında şaxələndirərək Mərkəzi Avropa bazarında da aktiv oyunçuya çevrilmək yolunda addımlarını atır.
Bu, bir daha Azərbaycanın Avropanın enerji təhlükəsizliyində rolunun artdığını təsdiqləyir. Prezident İlham Əliyevin də bir neçə dəfə təkrarladığı kimi, biz yaxın 5 ildə, yəni 2030-cu ilədək bu gün sahib olduğumuzdan əlavə 8 milyard kubmetr təbii qazı əmin şəkildə təmin edəcəyik. Həmçinin ixracın artırılması planlaşdırılır ki, onun da böyük hissəsi Avropa bazarlarına tuşlanacaq”.
Bölmənin digər xəbərləri
