AZƏRBAYCAN MİLLİ ELMLƏR AKADEMİYASI RƏYASƏT HEYƏTİNİN BƏYANATI
Yaranmış vəziyyətlə əlaqədar Elmlər Akademiyasının Rəyasət heyəti bu bəyanatla çıxış etməyi və cərəyan edən hadisələrə öz münasibətini bildirməyi zəruri hesab etmişdir. İlk növbədə, xüsusi vurğulamaq istərdik ki, Eldar Salayev Elmlər Akademiyasının həqiqi üzvüdür və əgər onun hüquqlarının müdafiəsinə ehtiyac duyulsaydı, elmi ictimaiyyət bunu özü edərdi. Biz əminik ki, yalnız son dərəcə tutarlı dəlillər və müxtəlif destruktiv aksiyaların qarşısını almaq zərurəti müvafiq strukturları Milli Elmlər Akademiyasının həqiqi üzvünü həbs etmək kimi qeyri-adi addım atmağa məcbur etmişdir. Eyni zamanda, təəssüflə bildirməliyik ki, son illər ərzində Eldar Salayev özünü elmi mühitdən tamamilə təcrid etmiş və elmi fəaliyyətlə heç cür bir araya gəlməyən həyat tərzi sürürdü.
Məlum olduğu kimi, Azərbaycan parlamentinin keçmiş sədri Rəsul Quliyev uzun müddət ərzində özünün təbliğinə yönəlmiş və ziyalıların mənəviyyatına olduqca mənfi təsir göstərən fəaliyyətlə məşğul olurdu. Müstəqilliyin ilk illərində mədəniyyət və elm xadimlərinin maddi vəziyyətlərinin kifayət qədər çətin olmasından sui-istifadə edərək, o, açıq-aşkar haram yolla əldə edilmiş pullarla özünün xeyirxah imicini yaratmağa çalışır, müxtəlif populist aksiyaların keçirilməsinə rəvac verir, ziyalıların bəzi nümayəndələrinə maddi yardım göstərirdi və s. Təəssüf ki, keçmiş parlament sədrinin savadsızlığına, səriştəsizliyinə və əsassız ambisiyalarına istehza ilə rişxənd edən bəzi şəxslər onun qarşısında məddahlıq edərək, Rəsul Quliyevin iddialarının hədsiz dərəcədə artması üçün münbit zəmin yaratmışlar. Eldar Salayevin xasiyyətinin yumşaqlığı və iradəsinin zəifliyi qısa müddət ərzində onu Rəsul Quliyevin canlı kölgəsinə çevirmişdi. O, istər-istəməz özünü elmdən uzaqlaşdırmış və siyasətbazların əlində iradəsiz bir alətə çevrilmişdi.
Nəticə etibarilə onun törətdiyi əməllər Elmlər Akademiyasını təəssüflənməyə məcbur edir və bu gün akademik elmin nümayəndəsinin ölkəmizin dövlət maraqları üçün təhlükə törədə bilən əməllərə görə məsuliyyətə cəlb olunması bizdə xəcalət hissi oyadır.
Elmlər Akademiyası yarandığı gündən, özünün şərəfli 60 illik tarixi boyu vətənə xidməti daim uca tutmuşdur. Biz sıralarımızda öz şəxsi dostluğunu və hədsiz iddialarını ümummilli maraqlardan üstün tuta bilən bir insanın olmasını ürəkağrısı ilə qəbul edirik. Eldar Salayevlə bağlı isə Avropa məkanında qəbul olunmuş tələblərə uyğun şəkildə baxılacağına ümidvar olduğumuzu bildiririk.
Biz əminik ki, ölkə parlamentinə seçkilər ərəfəsində baş verən hadisələr vətəndaşların öz iradələrini sərbəst şəkildə ifadə etməsinə mane ola bilməz və noyabrın 6-da Azərbaycan xalqı ölkəmizin ən layiqli oğul və qızlarına səs verəcəkdir. Şübhə etmirik ki, bəzi qüvvələrin siyasi şoularına baxmayaraq, Azərbaycan xalqının müdrikliyi ölkədə vəziyyətin sabitliyinin hansısa şəkildə pozulmasına imkan verməyəcək, demokratik seçkilərin özü isə ümumavropa dəyərləri sisteminə sadiq olduğumuzu dünyaya nümayiş etdirəcəkdir.
Milli Elmlər Akademiyasının Rəyasət heyəti vətəndaş cəmiyyətinin bütün nümayəndələrini ölkənin sırf hüquqi məkanında baş verən hadisələri özlərinin bu və ya digər məqsədlərinə çatmaq üçün siyasi oyuna çevirməməyə çağırır.
Milli Elmlər Akademiyasının
Rəyasət heyəti adından
Milli Elmlər Akademiyasının prezidenti
akademik Mahmud Kərimov
Bölmənin digər xəbərləri
