Aprelin 19-da Azərbaycan Milli Olimpiya Komitəsinin prezidenti İlham Əliyev MOK-un binasında iyunun 21-dən iyulun 4-dək Naxçıvanda keçiriləcək yeniyetmələr arasında dünya çempionatına hazırlığın gedişi ilə tanış olmaq üçün ölkəmizə gələn Beynəlxalq Şahmat Federasiyasının (FİDE) birinci vitse-prezidenti Georgios Makropulosu və vitse-prezident Zurab Azmayparaşvilini qəbul etmişdir. 

İlham Əliyev qonaqları səmimiyyətlə salamlayaraq dedi ki, Azərbaycanda, xüsusən də gənclər arasında şahmat geniş yayılmışdır. Təsadüfi deyil ki, son illər ölkəmizdə mötəbər beynəlxalq turnirlər keçirilir. Məsələn, bu yaxınlarda ölkəmizin paytaxtında gənclər arasında şahmat üzrə Avropa çempionatı təşkil edilmişdir. MOK prezidenti gənclərin növbəti dünya çempionatının Azərbaycanda keçirilməsi haqqında FİDE-nin qərarını alqışladı, yarışın paytaxtımızdan kənarda təşkil olunmasının vacibliyini xüsusi vurğuladı. Onun sözlərinə görə, çempionatın Naxçıvanda keçirilməsi bu diyar üçün unudulmaz hadisə olacaqdır. İlham Əliyev FİDE-nin prezidenti Kirsan İlyumjinovla xoş münasibətlər yaradıldığını və onun gənc, lakin artıq dünya şöhrətli şahmatçı olan Teymur Rəcəbovun nüfuzlu turnirlərdə iştirakına icazə verilməsi haqqında Azərbaycan MOK-un məktubunu müsbət cavablandırdığını da bildirdi.

MOK prezidenti qonaqlara son illər ölkəmizdə idmanın inkişafı sahəsində əldə edilmiş nailiyyətlər, Azərbaycan idmançılarının beynəlxalq yarışlarda qazandıqları parlaq qələbələr barədə ətraflı məlumat verdi. İlham Əliyev dedi ki, bütün bu nailiyyətlər, o cümlədən Milli Olimpiya Komitəsinin fəaliyyətinin gücləndirilməsi ölkədə hökm sürən ictimai-siyasi sabitliyin və iqtisadi tərəqqinin nəticəsidir. O, eyni zamanda, ölkəmizin hər bir şəhərində şahmat məktəbi açılmasına dair proqramın həyata keçirilməsində FİDE rəhbərliyinin Azərbaycana nə kimi kömək göstərə biləcəyi ilə maraqlandı. MOK prezidenti vurğuladı ki, idmanın bu növünün uşaqlar və gənclər arasında yayılması, ümumiyyətlə, şahmatın inkişafı ölkənin beynəlxalq nüfuzunun artmasına kömək edir. İlham Əliyev əmin olduğunu bildirdi ki, Naxçıvanda qarşıdakı dünya çempionatı yüksək səviyyədə keçəcəkdir.

FİDE-nin birinci vitse-prezidenti Georgios Makropulos səmimi qəbula görə təşəkkür edərək dedi ki, belə mötəbər turnirlərin Azərbaycanda keçirilməsi, ilk növbədə, şahmatın azərbaycanlılar arasında populyarlığının və idmanın bu növünə dövlətin qayğı göstərməsinin nəticəsidir. O xatrılatdı ki, dünyanın aparıcı şahmatçılarından biri - Harri Kasparov da vaxtilə məhz Azərbaycan Prezidenti Heydər Əliyevin qayğı və diqqəti sayəsində qrossmeyster olmuşdur. İndi Azərbaycanı başqa bir şahmatçı - Teymur Rəcəbov layiqincə təmsil edir. Onun fikrincə, Teymurun böyük gələcəyi var.

FİDE vitse-prezidenti Zurab Azmayparaşvili isə Azərbaycan dövləti başçısının respublikada şahmatın inkişafına diqqət yetirdiyini xüsusi vurğuladı.

Söhbət zamanı qarşıdakı dünya çempionatının keçirilməsi ilə bağlı bir sıra məsələlər də müzakirə olundu.

Sonda İlham Əliyev FİDE rəhbərlərinə Azərbaycan idmanı haqqında kitab və Milli Olimpiya Komitəsi adından hədiyyələr təqdim etdi. 

SUAL: Dünya Karate Federasiyasının Sizə təqdim etdiyi sertifikatı həm də Azərbaycan idmanına verilən qiymət kimi dəyərləndirmək olarmı?

CAVAB: Mən sizinlə razıyam. Bu, Azərbaycan idmanına verilən qiymətdir. Son illər ərzində Azərbaycanda idman inkişaf edir, olimpiya və qeyri-olimpiya idman növlərinin hamısı bizim diqqət mərkəzimizdədir. Biz burada ayrı-seçkilik etmirik və hər bir idman növü bizim üçün əzizdir. Xüsusilə karate kimi Azərbaycanda çox böyük ənənəsi olan idman növünü qeyd etmək istərdim. Mən cənab Espinosla söhbət edərkən dedim ki, hətta karatenin rəsmi şəkildə fəaliyyət göstərmədiyi və qadağa altında olduğu dövrdə Azərbaycanda bu idman növü yaşayırdı və inkişaf edirdi. Əlbəttə, belə bir turnirin Azərbaycanda keçirilməsi karate idman növünün daha da yayılmasına xidmət edəcəkdir. Bu mükafat mənim üçün çox əzizdir, cənab Espinos və Dünya Karate Federasiyası tərəfindən fəaliyyətimə verilən yüksək qiymətdir. Amma mən bunu ilk növbədə Azərbaycana, idmanımıza və idmançılarımıza verilən qiymət kimi qəbul edirəm. Təki, biz bu yüksək rütbəyə, yüksək dana layiq olar.

SUAL: Son zamanlar Azərbaycan futbolunda baş verənlərə münasibətinizi bildirərdinizmi?

CAVAB: Mən çox təəccüb etdim ki, FİFA belə qərar çıxartdı. Bilirsiniz ki, FİFA və UEFA rəhbərləri Azərbaycana məktubla müraciət etmişdilər və bizim idman nazirimiz o müraciətə cavab göndərmişdi. Bundan sonra onların Bakıya gəlməşi gözlənilirdi. Eyni zamanda hamımız görürdük ki, son aylar ərzində yaranmış böhran da yavaş-yavaş aradan qalxır, AFFA ilə klublar arasında razılıq əldə olunur. Klublar çempionatda iştirak etmək haqqında qərar qəbul etdikləri bir məqamda FİFA-dan belə bir qərarın gəlməsi gözlənilməzdir və heç bir məntiqə sığmır. Hesab edirəm ki, bu qərarda hansısa şəxsi amillər öz əksini tapır. Bilirsiniz ki, federasiya, idman hər hansı bir adamın adı ilə bağlana bilməz və əgər hansısa bir adam ümumi işə mane olursa, onun fəaliyyətində müsbət hallar yoxdursa, əksinə, onun fəaliyyəti bu idman növünün dağıdılmasına gətirib çıxarırsa, o adam, -əgər idmanı sevirsə,- vəzifədən yapışmamalı və könüllü şəkildə idmandan uzaqlaşmalıdır.

Təəssüf edirəm ki, Azərbaycan futbolunda belə deyildir. Burada şəxsi ambisiyalar, vəzifə hərisliyi və digər xoşagəlməz hallar futbolumuzu uçurum kənarına gətirib çıxarmışdır. İnanmaq istərdim ki, FİFA tezliklə öz qərarına düzəliş edəcək, ədalətsiz qərarı geri götürəcək və son günlər ərzində AFFA ilə klublar arasında yaranmış razılığı əsas götürərək, Azərbaycanda futbolun yaşamasına və inkişafına, bizim dünya futbolundan təcrid olunmamağımıza çalışacaqdır.

SUAL: Ümumiyyətlə idmanın siyasiləşdirilməsi Olimpiya xartiyasına zidd deyilmi?

CAVAB: Əlbəttə, bu, oimpiya prinsiplərinə ziddir. Futbol və bütün başqa idman növləri siyasətdən ayrı olmalıdır. Mən dəfələrlə demişəm, bizdə elə federasiyalar var idi ki, orada başqa siyasi əqidəyə malik olan insanlar işləyirdilər. Deyə bilərəm ki, federasiyaların əksəriyyətində siyasətlə məşğul olan adamlar yoxdur və olmamalıdır. Çünki idman, idmandır və ümummilli bir dəyər olaraq, o, hansısa partiyalara, siyasi maraqlara bölünməməlidir. Öz vəzifəsini qoruyub saxlamaq üçün, - bu, indi xüsusilə dəbdədir, - bəziləri özünü müxalifətçi kimi təqlid edir, belə hal gülünc görünür. Bəziləri cinayət törədir və yaxud hansısa bir nalayiq iş görür və bilir ki, bu işə görə cəzalandırılacaqdır. Onda dərhal özünü müxalifətçi kimi təqdim etməyə başlayır, gedib müxalifətin tədbirlərində iştirak edir, müxalifətlə bir yerdə guya hansısa mühüm məsələləri müzakirə edir və ondan sonra deyir ki, mən buna görə təqib olunuram. Halbuki, bu belə deyil və ictimaiyyət də bunu bilir. İdmanı siyasiləşdirmək olmaz. İdmana rəhbərlik edən insanlar ilk növbədə idmana zərər yox, xeyir gətirməlidirlər.

SUAL: İndi Azərbaycan idman mərkəzinə çevrilib, bugünkü turnir və mötəbər federasiyaların nümayəndələrinin Bakıya gəlməsi bunu bir daha təsdiq edir. Siz bu faktı necə qiymətləndirirsiniz?

CAVAB: Əlbəttə, mən bunu yüksək qiymətləndirirəm. Hesab edirəm ki, bu bizim son illər ərzində apardığımız məqsədyönlü işimizin məntiqi nəticəsidir. Milli Olimpiya Komitəsinin prezidenti kimi mən çox şadam ki, Azərbaycanda idmana rəhbərlik edən qurumlar arasında yekdillik var və fikir ayrılığı yoxdur. Biz - Gənclər və İdman Nazirliyi, Milli Olimpiya Komitəsi, federasiya və klublar, idman cəmiyyətləri vahid bir komanda kimi çalışırıq. Biz bir ailəyik və əməli işlərimiz də, nəticələrimiz də - çempionatlarda, oimpiya oyunlarında qazanılmış medallar da göstərir ki, Azərbaycanda idman necə sürətlə inkişaf edir və hansı zirvələrə qalxmışdır. Əlbəttə ki, bunların hamısı bizi çox sevindirir. İdman çox vacib amil olduğu qədər, eyni zamanda, hər bir ölkənin həyatı üçün çox mühüm sosial amildir. Biz istəyirik ki, uşaqlar idmanla məşğul olsun, pis işlərə qurşanmasınlar. İçki içməsinlər, siqaret çəkməsinlər, hansısa nalayiq hərəkətlərə yol verməsinlər. İdman bu mənada çox mühüm amildir ki, uşaqları və gəncləri pis vərdişlərdən qoruyur. Ona görə mən idmana məhz bu nöqteyi-nəzərdən baxıram. Əlbəttə ki, bu, həm də ölkənin imicidir. Ölkənin bayrağı qaldırılanda hər bir azərbaycanlı qürur hissi keçirir. Bu o deməkdir ki, idmançılarımız millətimizi sevindirir, təbliğ edirlər və Azərbaycanın idman şərəfini yüksəklərə qaldırırlar. Ona görə də mən bütün idmançılara, məşqçilərə minnətdaram və Azərbaycanda keçirilən böyük idman tədbirləri bir daha onu göstərir ki, biz düzgün yoldayıq.

X X X

Görüşlərdə gənclər, idman və turizm naziri Əbülfəz Qarayev iştirak edirdi.

AZƏRTAC

Foto İlqar Cəfərovundur