Azərbaycan müasir ordusu və texnikası ilə öz sözünü deyən dövlətlər sırasındadır
Bakı, 26 iyun, AZƏRTAC
Azərbaycanda Milli Ordunun yaradılması Xalq Cümhuriyyətinin fəaliyyəti dövrünə təsadüf edir. O zaman Çar Rusiyasının türk-müsəlman əhaliyə qarşı qərəzli münasibəti, onları orduda xidmətdən kənarlaşdırması xalqın hərbi işləri unutmasına gətirib çıxarmışdı. Bunu etməkdə başlıca məqsəd müsəlmanların hərbi sahəyə marağını məhv etmək olsa da, buna nail ola bilmədilər. Çünki ürəyində vətən sevgisi, vətən həsrəti olan xalqı heç kim hərbdən, döyüşdən kənarlaşdıra bilməz. 1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə ilk müntəzəm hərbi hissə - əlahiddə Azərbaycan korpusu yaradıldı, avqustun 1-də isə Azərbaycanın Hərbi Nazirliyi təsis olundu. Həmin il dekabrın 25-də general Səməd bəy Mehmandarov hərbi nazir, general-leytenant Əliağa Şıxlinski isə nazir müavini təyin edildi.
Bunu AZƏRTAC-a açıqlamasında AMEA-nın A.A.Bakıxanov adına Tarix İnstitutunun Qərbi Azərbaycan tarixi şöbəsinin elmi işçisi Tamara Rüstəmova söyləyib. O deyib ki, 1920-ci il aprelin 28-də bolşevik Rusiyasının təcavüzü nəticəsində Xalq Cümhuriyyətinin süquta uğraması ilə ordu quruculuğu prosesi dayandı.
Tamara Rüstəmova vurğulayıb ki, Milli Ordu quruculuğu Ulu Öndər Heydər Əliyevin 1969-cu ildə hakimiyyətə gəlişindən sonra yenidən canlandı: “Ümummilli Liderin əvəzolunmaz xidmətləri sayəsində ölkəmizdə hərbi kadrların hazırlanmasına başlanıldı. Heydər Əliyev 1971-ci ildə çox böyük bir iş görərək hərbi məktəb yaratdı və o məktəbə görkəmli sərkərdə Cəmşid Naxçıvanskinin adı verildi. Azərbaycanlı gənclər bu məktəbdə hərbin sirlərini öyrəndilər. Onlar Bakı Ali Birləşmiş Komandanlıq və Bakı Ali Hərbi Dənizçilik məktəblərində təhsil ala bildilər, eləcə də SSRİ-nin digər hərbi məktəblərinə güzəştli şərtlərlə qəbul olundular.
Azərbaycanın dövlət müstəqilliyi bərpa edildikdən sonra 1993-cü ildə ölkədə siyasi böhran kəskinləşdi. Belə bir şəraitdə xalq öz xilaskarına üz tutdu. Çünki xalq yaxşı bilirdi ki, bütün bunların öhdəsindən yalnız və yalnız Heydər Əliyev gələ bilərdi. Ümummilli Lider Heydər Əliyev xalqın tələbi ilə hakimiyyətə qayıtdı. Onun qayıdışı həm də ordu quruculuğuna çox böyük dəstək oldu.
“Heydər Əliyevin 1998-ci il 22 may tarixli Fərmanına əsasən, iyunun 26-sı Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir.
Zamanında Heydər Əliyevin yaratdığı hərbi məktəblər sayəsində oranı bitirən hərbçilərimiz 2020-ci il 27 sentyabrda əks-hücum əməliyyatı ilə başlayan Vətən müharibəsində düşmən üzərində tarixi Zəfərə imza atdı. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı Qələbəsinin şahidi oldu. Füzuli, Hadrut, Cəbrayıl, Zəngilan, Qubadlı, Şuşa, Kəlbəcər, Ağdam, Laçın və adıçəkilən rayonların 300-dən çox yaşayış məntəqəsi 44 gün ərzində azad edildi. Müntəzəm olaraq fərqli mənbələrdən və ünvanlardan müxtəlif təzyiqlər, təhdidlər olmasına baxmayaraq xalqımız Zəfər çaldı. Müzəffər Ali Baş Komandan İlham Əliyev bununla tarixi ədaləti bərpa etdi.
Bir dövləti güclü edən onun arxasında duran xalqıdır. Bu gün Azərbaycan dövləti həm müasir ordusu ilə, həm də müasir texnikası ilə öz sözünü deyən dövlətlər sırasındadır. Dövlətimizin daxili və xarici siyasəti xalq tərəfindən dəstəklənir. İstər hərb sahəsində, istər tibb sahəsində, istərsə də elm sahəsində Azərbaycan gəncləri bu gün öz sözlərini bütün dünyaya çatdırmağı bacarırlar”, - deyə Tamara Rüstəmova bildirib.
Bölmənin digər xəbərləri
