SİYASƏT
AZƏRBAYCAN MUSİQİSİ HOLLANDİYADA SƏSLƏNİR
AZƏRTAC xəbər verir ki, oktyabrın 20-də Hollandiyada Avropa Azərbaycan Qadınları İttifaqının ölkəmizin səfirliyi ilə birgə təşkil etdiyi və respublikamızın müstəqillik gününə həsr olunmuş Azərbaycan günü keçiriləcəkdir.
Həmin gün Haaqa sakinləri Niderlanddakı Azərbaycan diasporunun dəstəyi ilə hazırlanan konserti dinləyə biləcəklər. Konsertdə Hollandiyada yaşayan bəstəkar-müğənni Elxan Rzayev çıxış edəcəkdir. O, özü Azərbaycan xalq mahnılarını ifa etməklə yanaşı, yerli musiqiçiləri də bu işə cəlb edir. E.Rzayev özünün “Dostluq” adlı ilk albomunu 1998-ci ildə Azərbaycanda buraxmışdır.
Hazırda Elxan “Salam, Bakı” adlı yeni albom üzərində işləyir. Albom “Vətən” mahnısı ilə açılır. O, həm öz mahnılarını ifa edir, həm də tanınmış Azərbaycan bəstəkarlarının melodiyalarına sözlər yazır.
Bu yaxınlarda Elxan Hollandiyanın müxtəlif şəhərlərində üç solo konsert vermişdir. Maraqlıdır ki, Elxan Rzayevin rəhbərliyi ilə hollandiyalı müğənni Mariya Van Felze bir Azərbaycan mahnısı oxuyur.
Elxan deyir ki, Hollandiya dinləyiciləri Azərbaycan musiqisini çox bəyənir, musiqiçilər isə bizim mahnıları məmnuniyyətlə ifa edirlər. Həmyerlimiz Hollandiya sakinlərini zəngin Azərbaycan mədəniyyəti və incəsənəti ilə tanış edir.