AZƏRBAYCAN NEFTÇİLƏRİNİN ZƏNGİN TƏCRÜBƏSİNDƏN MOLDOVADA DA İSTİFADƏ OLUNACAQDIR

19.09.2006 [22:58]
Çap et
A⁺ A^-

Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, sentyabrın 19-da şirkətin prezidenti Rövnəq Abdullayev Moldova Respublikasının ekologiya və təbii sərvətlər naziri Konstantin Mixaylevskinin başçılıq etdiyi nümayəndə heyəti ilə görüşmüşdür. Konstantin Mixaylevski Rövnəq Abdullayevi 20 sentyabr Neftçilər günü münasibətilə təbrik edərək demişdir ki, ARDNŞ-in öyrənilməyə layiq zəngin təcrübəsi vardır və biz də bu təcrübədən yararlana bilərik. Nazir bildirmişdir ki, son illər Moldova ərazisində neftli-qazlı olması ehtimal edilən bir sıra strukturlar tapılıb. Həmin strukturların perspektivini müəyyənləşdirmək üçün azərbaycanlı ekspertlərin, xüsusilə seysmoloq və geofiziklərin köməyinə ciddi ehtiyac duyulur. Bu məqsədlə Moldova və Azərbaycan ekspertləri səviyyəsində ilkin işçi qrupunun yaradılmasına və qeyd olunan strukturlara birgə baxış keçirilməsinə zərurət yaranmışdır.

ARDNŞ-in prezidenti səmimi təbrik üçün qonaqlara təşəkkürünü bildirmiş və onları neftçilərin peşə bayramı münasibətilə keçiriləcək tədbirlərdə iştirak etməyə dəvət etmişdir. Azərbaycan neft sənayesinin tarixi haqqında ətraflı məlumat verən R.Abdullayev, xüsusilə son illərdə qazanılmış uğurlardan söz açmış, nailiyyətlərin əsasında Azərbaycan xalqının ümummilli lideri Heydər Əliyevin neft strategiyasının dayandığını vurğulamışdır. O demişdir ki, həqiqətən də ARDNŞ-in neft yataqlarının kəşfiyyatı və işlənilməsi sahəsində çox zəngin təcrübəsi var və biz bu təcrübəni dost Moldova xalqı ilə bölüşməyə hazırıq. Əgər birgə səylər sayəsində sizdəki strukturların perspektivliyi aşkarlanarsa, biz onların geofiziki və geoloji işlənməsinə hazırlıq üzrə lazımi tədbirlərin aparılmasında hər cür kömək göstərə bilərik.

ARDNŞ-in prezidenti Rövnəq Abdullayev moldovalı qonaqlara aparılacaq birgə tədqiqatlarda uğurlu nəticələr əldə etməyi arzulamışdır.