Azərbaycan ona qarşı həyata keçirilən revanşist addımlar qarşısında heç vaxt geri çəkilməyib -ŞƏRH
Bakı, 26 yanvar, AZƏRTAC
Azərbaycan nümayəndə heyətinin Avropa Şurası Parlament Assambleyasında fəaliyyətini (AŞPA) qeyri-müəyyən müddətə dayandırması və təmsilçilərimizin bu addımı atmağa məcbur edilməsi ölkəmizdə, eləcə də regionda çox ciddi əks-səda yaradıb. Şübhəsiz ki, bu cür müzakirələr Azərbaycan-Ermənistan münasibətlərinə birbaşa təsir edir. Görünən budur ki, Avropa İttifaqına (Aİ) və Avropa Şurasına daxil olan, Ermənistanı müdafiə edən bir sıra dövlətlər İrəvanla bağlı planlarını yerinə yetirə bilmirlər. Azərbaycanın apardığı müstəqil siyasət bu planların yerinə yetirilməsinə ciddi maneə yaradır. Avropadakı revanşist qrupların məqsədi Ermənistanın mövqeyini müdafiə edərək onu mümkün təhlükələrdən qorumaqdır. Onlar Azərbaycanla Ermənistan arasında münasibətlərin normallaşmasını regionla bağlı planları üçün təhlükə hesab edirlər. Eyni zamanda, Ermənistanı Rusiya ilə əməkdaşlıqdan uzaqlaşdırmaq üçün bir sıra layihələr həyata keçirirlər və bunlar da müəyyən nəticələr verir. Çünki Ermənistan ictimaiyyətində Rusiyanın rəhbərlik etdiyi bir sıra təşkilatlardan uzaqlaşmaq, ölkənin qərbyönümlü siyasət yürütməsinə dair fikirlər səsləndirilir. Bütün bu səylərə baxmayaraq Qərbin Ermənistanı regionun lider dövlətinə çevirmək planları baş tutmadı. Belə olduqda müxtəlif Avropa təsisatlarında Azərbaycana qarşı lokal siyasi hücumlar həyata keçirilməyə başlanıldı.
Bu sözləri AZƏRTAC-a açıqlamasında Bakı Dövlət Universitetinin professoru, politoloq Əlimusa İbrahimov söyləyib.
Politoloq qeyd edib ki, Qərb Ermənistanı bu vaxta qədər mümkün təzyiqlərdən qoruya bilməyib. Çünki həmin dairələr Azərbaycana işğal altında olan torpaqlarını azad etməyə imkan verməyəcəkləri barədə Ermənistana vəd vermişdilər. Buna görə də ATƏT-in Minsk qrupu 30 ilə yaxın bir dövrdə münaqişənin həll edilməməsi üçün böyük səy göstərdi. Bu illər ərzində verdikləri vədlərlə münaqişənin həllinə müəyyən müddətdə mane olsalar da, Azərbaycan hansısa mərkəzlərin diktəsinə və təzyiqlərinə baxmayaraq 44 günlük Vətən müharibəsində işğal altında olan torpaqlarını hərbi yolla azad etdi. 2023-cü ildə isə öz ərazi suverenliyini tam bərpa etdi.
Ə. İbrahimov Ermənistanın müharibədə məğlub olması ilə onun nüfuzunun itirilməsinə diqqət çəkib. O vurğulayıb ki, belə olan vəziyyətdə Qərb dairələri, Fransa və Avropa Şurası yenidən Ermənistana yardım göstərməyi və problemlərini həll etməyi qarşılarına məqsəd qoyublar.
“Azərbaycanın isə həm regionda, həm də qlobal miqyasda nüfuzu gündən-günə artmaqda davam edir. Ölkəmiz bütün təzyiqlərə baxmayaraq müstəqil siyasət yürüdərək torpaqlarımızı işğaldan azad edib və regional güc mərkəzinə çevrilib. Təbii ki, bu amillər radikal revanşist qrupları narahat etməkdə davam edir. Eyni zamanda, onlar hesab edirlər ki, Azərbaycan təkcə bu qalibiyyətlə kifayətlənməyəcək. Azərbaycanın ədalətli və beynəlxalq hüquqa əsaslanan haqlı mövqeyi bundan ibarətdir ki, Ermənistandan qaçqın düşən əhali öz doğma yurd yerlərinə qayıtmalı və orada yaşamaq hüququ qazanmalıdır. Məhz Azərbaycanın bu mövqeyinə görə dövlətimizin daha da irəli gedərək həmin torpaqları da azad edəcəyini düşünürlər. Azərbaycan həmin torpaqları da azad etmək istəsə və Zəngəzur dəhlizi məsələsi reallaşsa, Qərb öz partnyoru hesab etdiyi Ermənistana yardım edə bilməyəcək.
Bundan əlavə, bir sıra regional məsələlərin həlli istiqamətində Azərbaycanın Rusiya ilə birgə əməkdaşlıq etməsi də Qərb dairələrini narahat edir. Həmin qüvvələr Ermənistanın Rusiyaya qarşı səsləndirdiyi iddiaların Azərbaycan tərəfindən də irəli sürülməsinə çalışırdılar. Azərbaycan isə yürütdüyü müstəqil siyasətlə öz maraqlarını bütün dövlətlərin maraqlarından üstün tutur. Ona görə də AŞPA-nın qış sessiyası öz işinə başlayan kimi ölkəmizə qarşı bir sıra radikal qruplar tərəfindən əsassız iddialar səsləndirildi və bununla da ölkəmizin qurumda səsvermə hüququnu əlindən almağa çalışdılar. Təbii ki, bütün bunların fonunda Azərbaycan nümayəndə heyəti bəyanatla çıxış edərək AŞPA-dakı fəaliyyətinə qeyri-müəyyən müddətə son qoydu. Biz ilk dəfə deyil ki, AŞPA-dan gələn bu cür təzyiqlərlə üz-üzə qalmışıq. Onlar nəzərə almalıdırlar ki, müxtəlif dövrlərdə Azərbaycan ona qarşı həyata keçirilən bu cür revanşist addımlar qarşısında geri çəkilməyib və öz haqqını sonadək müdafiə edib. Hesab edirəm ki, bu bizim növbəti sınağımızdır və dövlətimiz bu sınaqdan da uğurla çıxacaq”- deyə Ə.İbrahimov bildirib.
Bölmənin digər xəbərləri
