Azərbaycan Ordusu BMT Təhlükəsizlik Şurasının itirilmiş nüfuzunu özünə qaytarır
Bakı, 22 oktyabr, AZƏRTAC
Otuz ilə yaxındır Azərbaycan dövləti Ermənistan-Azərbaycan Dağlıq Qarabağ münaqişəsinin beynəlxalq hüququn norma və prinsipləri əsasında həlli istiqamətində səylər göstərirdi, amma işğalçı Ermənistanın qeyri-konstruktiv mövqeyi, yalanları, riyakarlığı ucbatından danışıqlarda hansısa nəticədən danışmaq qeyri-mümkün idi. Dövlətimizin başçısı İlham Əliyev bu günlərdə xalqa müraciətində də bu məqamı xüsusi qeyd etdi ki, işğal altındakı torpaqlarda Ermənistan tərəfindən qurulmuş istehkamlar onu göstərir ki, onlar bu torpaqları bizə vermək fikrində deyildilər. Sadəcə olaraq, bizi və beynəlxalq vasitəçiləri aldadırdılar. Bununla onlar vaxtı uzadır və işğal edilmiş torpaqlarda qanunsuz məskunlaşma həyata keçirirdilər. Prezident İlham Əliyev ən yüksək tribunalardan, xüsusilə bir müddət əvvəl BMT Baş Assambleyasının yubiley tədbirində bu reallığı da dünyaya bəyan etdi ki, Ermənistan yeni ərazilər uğrunda müharibə planı hazırlayır. Amma dünya yenə də əvvəlki ənənələrinə uyğun olaraq ikili standartlar siyasətinə sadiqliyi fonunda işğalçının başına sığalından əl çəkmədi.
Bu fikirləri AZƏRTAC-a açıqlamasında Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov bildirib.
S.Qurbanov qeyd edib ki, BMT Təhlükəsizlik Şurasının qətnamələrinə məhəl qoymayan Ermənistana heç bir sanksiyanın tətbiq olunmaması onun daha böyük iddialarla çıxış etməsinə rəvac verir. Dövlətimizin başçısı İlham Əliyev haqlı olaraq bildirir ki, beynəlxalq münasibətlərdə hüquq problemi yaşanır. Ermənistana zamanında beynəlxalq təşkilatların qərar və qətnamələrinə məhəl qoymadığına, beynəlxalq hüquq normalarını kobud şəkildə pozduğuna görə sanksiyalar tətbiq edilsəydi, bu qədər azğınlaşmaz, qudurmazdı. N.Paşinyanın bu günlərdə “münaqişənin diplomatik həlli yoxdur” kimi açıqlaması da onun danışıqlar prosesinin bərpası ilə bağlı cəhdlərində, həmçinin dünya dövlətlərinə, nüfuzlu beynəlxalq təşkilatlara yalvarışlarında riyakarlığını göstərir. Ermənistanın baş naziri beynəlxalq hüququn mövcudluğunu inkar edir, onun ardınca münaqişənin diplomatik həllinin mümkünsüzlüyünü bildirərək, bütün hakimiyyət orqanlarını, mülki şəxsləri silahlanmaya çağıraraq hərbi əməliyyatlara sövq edir, amma ATƏT-in Minsk qrupunun həmsədrləri seyrçi mövqeyindən əl çəkmir.
“Azərbaycan 27 il gözlədi ki, qətnamələr icra edilsin. Onlar, sadəcə olaraq, kağız üzərində qaldı. Nə üçün? Prezident İlham Əliyev bəyan etdiyi kimi, çünki siyasi iradə göstərilmədi, bu qətnamələrin icra mexanizmi müəyyən edilmədi. Mənfur düşmən hesab etdi ki, o, bundan sonra da buna məhəl qoymaya bilər, - söyləyən S.Qurbanov bildirib ki, 30 ilə yaxın səbir nümayiş etdirən dövlətimiz və xalqımız indi məsələni özü həll edir, Azərbaycan Ordusu Vətən müharibəsini davam etdirərək, qısa zamanda bütün ərazilərimizi işğaldan azad edəcək. “Həm savaş meydanında, həm də diplomatik müstəvidə sarsıdıcı, öldürücü zərbələrlə qarşılaşan işğalçı ölkə təşvişdədir. Əslində, şanlı Ordumuz bu yaramazlara insanlığa düşmən olmağın, azərbaycanlılara qarşı etnik təmizləmə aparmağın, soyqırımı törətməyin, vətəndaşlarımızı doğma torpaqlarından didərgin salmağın, əxlaqı, qanunu, beynəlxalq hüququ ayaq altına atmağın hesabını ödətdirir. Ermənistan “güclü erməni diasporu”, “məğlubedilməz erməni ordusu” kimi miflərdən ayılmalı, haqq yolunda vuruşan güclü Azərbaycan Ordusunun qarşısında diz çökməli və məğlubiyyətlə barışmalıdır”, - deyən deputat bildirib ki, bu gün Azərbaycan Ordusu BMT Təhlükəsizlik Şurasının, o cümlədən də beynəlxalq təşkilatların deqradasiyaya uğramış mənəvi dəyərlərini, itirilmiş nüfuzunu özünə qaytarır. “27 il bundan əvvəl -1993-cü il noyabrın 12-də qəbul edilən Zəngilan rayonunun işğaldan azad olunması ilə bağlı 884 saylı qətnamənin icrasını Ordumuz layiqincə yerinə yetirdi. Hazırda digər 3 qətnamənin icrasına səylər göstərilir. Prezident İlham Əliyevin xalqa müraciətində böyük əminliklə söylədiyi “Mən bir daha bəyan edirəm ki, verilmiş bütün vədləri mən yerinə yetirirəm, verilmiş bütün vədlərə sadiqəm. Prezident kimi mənim fəaliyyətim üçün əsas məsələ, əsas vəzifəm Azərbaycan torpaqlarının qaytarılmasıdır, ərazi bütövlüyünün bərpa edilməsidir və bu gün biz bunu döyüş meydanında edirik” fikirləri və bunların reallıqda öz əksini tapması xalqımızı daha da qürurlandırır. Xalqın Ali Baş Komandana olan inamı dövlət siyasətinin gücünü artırır və daha səmərəli edir. Xalq tərəfindən göstərilən etimad böyük qələbəmizi yaxınlaşdırır”, - deyə Sadiq Qurbanov fikirlərini yekunlaşdırıb.
Bölmənin digər xəbərləri
