AZƏRBAYCAN OVÇULARININ 12-Cİ QURULTAYI KEÇİRİLMİŞDİR
Cəmiyyətin sədri Ramazan İsmayılov qurultaylararası dövrdə görülmüş işlər, qarşıda duran vəzifələr barədə danışaraq, “Ovçuluq haqqında” Qanunun qəbulundan, cəmiyyətin Nizamnaməsinin təsdiq edilməsindən sonra qurumun fəaliyyətində əsaslı keyfiyyət dəyişikliklərinin baş verdiyini faktlarla diqqətə çatdırdı. İyulun 3-də Azərbaycan Prezidenti İlham Əliyevin sədrliyi ilə ölkəmizdə ekoloji vəziyyətin yaxşılaşdırılması məsələlərinə həsr olunmuş müşavirədə irəli sürülmüş mühüm müddəaların həyata keçirilməsi, ölkəmizin flora və faunasının mühafizəsi, brakonyerliklə mübarizə sahəsində qarşıda duran vəzifələr təhlil edildi.
Məruzədə qeyd edildi ki, respublikamızın 176,8 min hektar ümumi sahəsi olan ovçuluq təsərrüfatlarında 15.510 baş dırnaqlı, 68.720 baş xəzli heyvan, 4 milyon 380 minə qədər quş vardır. Onlardan maral, dağıstan turu, qarapaça, cüyür, porsuq, vəhşi pişik, dovdaq, qartal, kəklik, turac, qırqovul, bəzdək, faminqo, qamışquşu və başqa nadir növlərin baş sayının artırılması da cəmiyyət üzvlərinin ümdə vəzifələrindən biridir.
Təsərrüfathesablı təşkilat olan “Azərovçu”nun bank hesabına ötən qurultaydan indiyədək cəmi 126 min AZN üzvlük haqqının toplanması, bundan təqribən 2 dəfə çox borc qalığının yığıldığı bildirildi. 10 mindən çox üzvü olan cəmiyyətin sıralarına son illər 3 mindən çox gənc ovçunun da daxil olması ilə təşkilatın sıralarının xeyli genişləndiyi vurğulandı.
Məruzə və çıxışlarda problemlərdən də danışıldı, onların aradan qaldırılması ilə bağlı təkliflər səsləndi, bir sıra ovçuluq təsərrüfatlarında cəmiyyətin vəsaiti hesabına tikilmiş obyektlərin, alınmış inventar və avadanlığın qorunub saxlanması, onlardan səmərəli istifadə edilməsi, “Azərovçu”nun üzvlərinin hüquqlarından istifadə etməsi üçün lazımi tədbirlərin görülməsi və s. məsələlərə diqqət yetirildi.
Sonra cəmiyyətin rəhbər orqanları seçildi. Təşkilati məsələyə baxıldı və Ramazan İsmayılov yenidən cəmiyyətin sədri seçildi.
