AZƏRBAYCAN PREZİDENTİ İLHAM ƏLİYEV PEKİNDƏ OLİMPİYA KƏNDİNDƏ OLMUŞ, ÖLKƏMİZİN İDMANÇILARI İLƏ GÖRÜŞMÜŞDÜR
AZƏRTAC xəbər verir ki, avqustun 9-da Azərbaycan Respublikasının Prezidenti İlham Əliyev Pekində Olimpiya kəndində olmuşdur.
Dövlətimizin başçısını səmimiyyətlə qarşılayan Olimpiya kəndinin meri onu olimpiyaçıların yaşadıqları məkanla tanış etdi, Azərbaycan idmançılarının Pekin Olimpiadasında uğurla çıxış edəcəyinə əminliyini bildirdi.
Sonra Prezident İlham Əliyev gənclər və idman naziri Azad Rəhimovun və ölkəmizin nümayəndə heyətinin şef-demisionu İlham Mədətovun müşayiəti ilə Azərbaycan idmançılarının qaldıqları binaya gəldi, onlar üçün yaradılmış şəraitlə tanış oldu.
Daha sonra Azərbaycan nümayəndə heyətinin yaşadığı binanın qarşısındakı həyətdə idmançılarımız və onların məşqçiləri ilə söhbət edən Prezident İlham ƏLİYEV dedi:
- Olimpiya oyunları elə bir yarışdır ki, burada istənilən nəticə ola bilər. Ancaq bizim idmançılarımızın bu vaxta qədərki uğurları ümid etməyə əsas verir ki, yaxşı nəticələr olmalıdır. İndi hər şey sizdən asılıdır, eyni zamanda, hakimlər də ədalətli olmalıdırlar. Əminəm ki, siz Azərbaycan bayrağını yüksəklərə qaldıracaqsınız. Ən əsas yaxşı idman formasını saxlamaq və yarışlara hazır olmaqdır. Bizim komandamız çox böyükdür, biz dünən tribunadan bütün komandaların meydana gəlməsini seyr edirdik və görürdük ki, kifayət qədər böyük komandamız var.
Yaxşı belə bir ənənə yaranıb - iştirak etdiyimiz ilk Olimpiya oyunlarında bir medal qazanmışdıq, ikinci Olimpiadada üç, üçüncü Olimpiadada beş medal. Amma o da həqiqətdir ki, hər dəfə medal qazanmaq daha da çətin olur. Çünki həm rəqabət artır, həm də maraq artır. İndi, demək olar ki, Olimpiya oyunlarına bütün dünyada böyük maraq var. Hər bir ölkə istəyir ki, onun idmançıları yaxşı nəticə göstərsin. İndi Azərbaycanda da çox güclü idman məktəbi var və o, daha da güclənir. İdmançılarımızın əksəriyyəti Olimpiya oyunlarında ilk dəfə iştirak edir. Bu da onu göstərir ki, bizdə idman məktəbi inkişaf edir və idmanla məşğul olmaq üçün Azərbaycanda indi hər cür şərait var. Həm idmançılar üçün, həm də ki, adi vətəndaşlar üçün. Mən də hər dəfə Bakıda, rayonlarda cavanlarla görüşəndə deyirəm ki, siz gedin idmanla məşğul olun. İdmançı olmasanız da, idman insanları gücləndirir. Siz bunu yaxşı bilirsiniz, həm fiziki, həm də mənəvi cəhətdən gücləndirir. Hər bir insan gərək öz sağlamlığına, fiziki formasına fikir versin.
Sizin qələbələriniz, əlbəttə ki, gənc nəsil üçün də böyük stimul olacaqdır. Mənim yadımdadır, Sidney, Afina Olimpiya oyunlarından sonra uşaqlar idman bölmələrinə kütləvi şəkildə gəlməyə başlamışlar. Xüsusilə indi bizim bütün bölgələrdə gözəl idman komplekslərimiz var, idman salonlarımız var. Biz - həm federasiyalar, idman cəmiyyətləri, həm də Milli Olimpiya Komitəsi, Gənclər və İdman Nazirliyi bu şəraiti yaradırıq. Çox şey demək olar, amma siz bütün vəzifələri özünüz yaxşı bilirsiniz. Onu da bilirsiniz ki, Azərbaycan xalqı sizə baxır, sizə azarkeşlik edir və sizin uğurlarınızı gözləyir.
X X X
Azərbaycan Prezidentinə Pekin Olimpiya kəndinin xatirə hədiyyəsi təqdim olundu.
Dövlətimizin başçısı Olimpiya kəndinin xatirə kitabına ürək sözlərini yazdı.
Prezident İlham Əliyev Azərbaycan idmançıları ilə xatirə şəkli çəkdirdi.
Sonra Olimpiya kəndinin yeməkxanası ilə tanış olan Azərbaycan Prezidentinə məlumat verildi ki, bura bütün gün ərzində fasiləsiz işləyir və eyni vaxtda 3500 idmançı yemək yeyə bilər. Burada məşhur Litva basketbolçusu, bir müddət ölkəmizdə məşqçi işləmiş Rimas Kurtinaytis Azərbaycan Prezidentinə yaxınlaşaraq səmimiyyətlə görüşdü, olimpiyaçılarımıza uğurlar arzuladı.
######
 |
 |
Bölmənin digər xəbərləri
