AZƏRBAYCAN PREZİDENTİ İLHAM ƏLİYEVİN PEKİNƏ SƏFƏRİ BAŞA ÇATMIŞDIR
AZƏRTAC xəbər verir ki, XXIX Yay Olimpiya oyunlarının açılış mərasimində iştirak edən və yarışları izləyən Azərbaycan Respublikasının Prezidenti İlham Əliyevin avqustun 14-də Çin Xalq Respublikasına səfəri başa çatmışdır.
Dövlətimizin başçısını və xanımı Mehriban Əliyevanı Pekinin beynəlxalq hava limanında Çinin yüksək vəzifəli dövlət və hökumət nümayəndələri yola saldılar.
X X X
Dövlətimizin başçısı Olimpiya oyunlarında qızıl medal qazanmış cüdoçu Elnur Məmmədli, Olimpiadanın gümüş mükafatçıları, güləşçilər Rövşən Bayramov və Vitali Rəhimovla təyyarədə görüşüb söhbət etmişdir.
Prezident İLHAM ƏLİYEV olimpiyaçılara müraciətlə dedi:
- Böyük qələbə münasibətilə sizi təbrik edirəm. Bir qızıl, iki gümüş medal qazandınız. Şəxsi mübarizədə uğur qazanmaq böyük bir nailiyyətdir. Böyük qələbə qazanmısınız, bütün Azərbaycan xalqını sevindirmisiniz. Görüşlər çox gərgin keçibdir və siz bu gərgin mübarizədə Azərbaycanın idman şöhrətini yüksəklərə qaldırmısınız. Hamınız gəncsiniz, sizin hələ böyük gələcəyiniz var. Bu, sizin idman karyeranızda ən böyük nailiyyətdir. Olimpiya oyunları ən böyük idman yarışıdır. Bütün dünya bu Oyunlara hazırlaşır. Mən görürəm ki, Azərbaycan bütün başqa ölkələr arasında ən qabaqcıl yerlərdədir. 14-cü yerdədir. İdmançılarımız bundan sonra da yarışacaq, biz yeni-yeni qələbələr gözləyirik. Əlbəttə, Rövşənlə Vitali qızıl medal qazanmaq istəyirdilər, bu təbiidir və deyə bilərəm ki, buna yaxın idilər. Ancaq gümüş medal da böyük nailiyyətdir. Bundan sonra da bütün yarışlarda belə davam eləmək lazımdır.
Yenə də deyirəm ki, siz gəncsiniz, böyük idman gələcəyiniz var və Azərbaycanın idman şöhrətini həmişə yüksəklərdə saxlamaq üçün böyük işlər görəcəksiniz. Elnur ümumiyyətlə, nadir bir nəticə göstərdi. Mən dedim ki, araşdırsınlar, Olimpiya oyunlarının tarixində belə bir hal olubmu ki, bütün beş görüşü təmiz qələbə, ipponla nəticələnsin?! Belə hadisə olmayıbdır.
ELNUR MƏMMƏDLİ: Bəli, cənab Prezident! Finalda Cənubi koreyalı idmançını, özünüz bildiyiniz kimi, 13 saniyəyə!
İLHAM ƏLİYEV: Mənə demişdilər, o koreyalı idmançı daha əvvəl dünya çempionatında hakimlərin düzgün olmayan hərəkətləri nəticəsində qızıl medal qazanmışdı.
Bundan sonra da dünya çempionatları, Olimpiya oyunları olacaqdır. Sizin nümunəniz bütün başqa gənc idmançıları da ruhlandırır. Siz onlar üçün nümunəsiniz! Həm idmanda, həm də həyatda bütün idmançılar üçün nümunə olmalısınız. Bu, böyük şərəfdir, böyük xoşbəxtlikdir. Amma, eyni zamanda, böyük məsuliyyətdir. Sizin adınız Azərbaycanın nəinki idman tarixinə, ümumən müstəqil Azərbaycanın tarixinə yazılmışdır və gələcəkdə öz fəaliyyətinizdə həmişə bunu nəzərdə saxlamalısınız. Siz gənc idmançılar, cavanlar, uşaqlar üçün nümunəsiniz.
X X X
Olimpiya çempionu Elnur Məmmədli, gümüş medalçılar Rövşən Bayramov və Vitali Rəhimov idmançılara göstərilən dövlət qayğısına görə Prezident İlham Əliyevə təşəkkür etdilər. Bildirdilər ki, dövlət başçısının yarışları şəxsən izləməsi onlara qələbə qazanmaqda əlavə güc vermişdir. Olimpiyaçılarımız Azərbaycanın idman şərəfini bundan sonra da ləyaqətlə qoruyacaqlarını bildirdilər.
Prezident İlham Əliyev bir daha idmançıları təbrik etdi, uğurlar arzuladı.
X X X
Heydər Əliyev adına beynəlxalq hava limanında Prezident İlham Əliyevi və xanımı Mehriban Əliyevanı, habelə dövlətimizin başçısı ilə vətənə qayıtmış olimpiyaçılarımızı idmançıların ailə üzvləri, paytaxt sakinləri, idmansevərlər hərarətlə, gül-çiçəklə qarşıladılar.
Prezident İlham Əliyev və xanımı Mehriban Əliyeva Olimpiya çempionu Elnur Məmmədlinin, gümüş medalçılar Rövşən Bayramov və Vitali Rəhimovun ailə üzvləri ilə görüşdülər, onları övladlarının qələbəsi münasibətilə təbrik etdilər.
Azərbaycan Prezidenti və xanımı Pekin Olimpiadasında ölkəmizə ilk medalları qazandırmış idmançılar və onların ailə üzvləri ilə xatirə şəkli çəkdirdilər.
######
 |
 |
Bölmənin digər xəbərləri
