Azərbaycan Respublikasında seçki praktikasının təkmilləşdirilməsinə dair, habelə Azərbaycan Respublikasının Milli Məclisinə seçkilərin hazırlanması və keçirilməsi ilə bağlı təxirəsalınmaz tədbirlər haqqında Azərbaycan Respublikasının Prezidenti cənab İlham Əliyevin 2005-ci il mayın 11-də və oktyabrın 25-də imzaladığı sərəncamlar parlament seçkilərinin ən yüksək standartlara uyğun şəkildə hazırlanması və keçirilməsi üçün lazımi şəraitin yaradılmasına sanballı töhfə verir. Seçkilərdə exit-pollun tətbiqi, barmaqların gözə görünməyən mürəkkəblə işarələnməsi, müşahidəçilər dairəsinin genişləndirilməsi, qeyri-hökumət təşkilatlarının seçkiləri müşahidə etməsi üzərində məhdudiyyətlərin götürülməsi, dövlət hakimiyyəti orqanlarının seçkilərdə bitərəf mövqe tutmasının təmin edilməsi, seçki hüquqlarının pozulması ilə bağlı prokurorluğa daxil olan məlumatların operativ və hərtərəfli araşdırılması, seçki komissiyalarının normal fəaliyyətinə bütün lazımi şəraitin yaradılması üçün müəyyənləşdirilən tədbirləri seçki iştirakçılarının tam əksəriyyəti razılıqla qarşılamış, eləcə də beynəlxalq təşkilatların rəhbərləri və aparıcı xarici dövlətlərin siyasi liderləri yüksək qiymətləndirmişlər. Bununla da, seçkilərin ədalətli və şəffaf keçirilməsini yersiz şübhə altına almağa imkan verə biləcək bütün ehtimallara son qoyulmuşdur. Eyni zamanda, dövlətimizin başçısının tövsiyəsi ilə bu il iyunun 28-də Milli Məclis tərəfindən qəbul edilmiş “Azərbaycan Respublikasının Seçki Məcəlləsinə əlavələr və dəyişikliklər edilməsi haqqında” Qanun seçki praktikasının daha da yaxşılaşdırılmasına kömək etmişdir.

Beləliklə, ölkəmizdə parlament seçkilərinin demokratik şəraitdə hazırlanması və keçirilməsi üçün həm qanunvericilik bazası, həm də faktiki şərait yaradılmışdır. Azərbaycan xalqı və dünya ictimaiyyəti Prezident İlham Əliyevin müasir demokratik standartlara cavab verən seçkilərin keçirilməsinə yönəlmiş siyasi iradəsinin reallığa çevrilməsinin şahidi olmuşdur.

Seçki kampaniyasının qanunun tələblərinə uyğun şəkildə aparılması təmin edilmişdir. Ölkəmizin tarixində görünməmiş sayda, yəni iki mindən artıq şəxsin parlament üzvlüyünə namizədliyi qeydə alınmışdır. Namizədlər arasında Azərbaycanın bütün siyasi qüvvələri təmsil olunmuşlar. Kütləvi informasiya vasitələri, o cümlədən televiziya kanalları ilə seçkiqabağı təbliğat-təşviqat kampaniyasının aparılması üçün siyasi əqidəsindən, partiya mənsubiyyətindən asılı olmayaraq bütün namizədlərə bərabər şərait yaradılmışdır. Eyni zamanda, hər bir siyasi partiyanın, siyasi partiyalar blokunun və namizədin seçicilərlə görüşlər və digər seçkiqabağı təbliğat tədbirləri keçirməsi üçün müvafiq yerlər ayrılmışdır. Bütün bunlar Azərbaycan dövlətinin səyləri nəticəsində ölkəmizdə demokratik seçki mühitinin formalaşdığını göstərir.

Azərbaycan Respublikasının Milli Məclisi əmin olduğunu bildirir ki, 2005-ci ilin parlament seçkiləri yüksək beynəlxalq standartlara uyğun şəkildə keçiriləcək və xalqın etimadını qazanan namizədlər parlament üzvü mandatını əldə edəcəklər.

Ölkəmizin qanunvericilik orqanına seçkilər Azərbaycan Respublikasının inkişafında yeni mərhələnin başlandığı bir dövrə təsadüf edir. Möhtərəm Prezidentimiz İlham Əliyevin rəhbərliyi ilə həyata keçirilən sosial-iqtisadi inkişaf strategiyası dövlətimizə yeni böyük uğurlar gətirmişdir. Hazırda Azərbaycan dünyanın ən dinamik inkişaf edən ölkələri sırasındadır.

Bu günlərdə Azərbaycan Respublikasının 2006-cı il üçün dövlət büdcəsi və büdcə zərfinə daxil olan digər sənədlər parlamentdə müzakirə və qəbul edilmişdir. Dövlət büdcəsi gəlirlərinin durmadan artması Azərbaycanın demokratik cəhətdən inkişaf etmiş qüdrətli bir dövlətə çevrilməsini, xalqımızın rifah halının daha da yüksəlməsini təmin edir. Ölkədə genişmiqyaslı siyasi, hüquqi, iqtisadi və sosial islahatlar ardıcıl surətdə davam etdirilir. Azərbaycan beynəlxalq aləmdə mövqelərini daha da möhkəmləndirmiş və dünya birliyinin dəyərli üzvünə çevrilmişdir. Dövlətimiz Avropa ilə Asiyanı daha sıx bağlayan transmilli iqtisadi layihələrin həyata keçirilməsində mərkəzi yer tutan ölkə kimi böyük nüfuz qazanmışdır.

Bütün bunlarla yanaşı, Azərbaycan Respublikasının Milli Məclisi narahat olduğunu bildirir ki, xalqımıza qarşı düşmənçilik yoluna düşən, ölkəmizin inkişafını istəməyən qüvvələr son dövrdə pozuculuq fəaliyyətini gücləndirmişlər. Dövlətimizin coğrafi-siyasi mövqeyinin daha da möhkəmlənməsinə, bir sıra problemlərinin həllinə kömək göstərəcək Bakı-Tbilisi-Ceyhan əsas neft ixrac boru kəmərinin istifadəyə verilməsi ərəfəsində onlar Azərbaycanda ictimai-siyasi sabitliyi pozmaq, konstitusion hakimiyyəti zorakılıqla ələ keçirmək niyyətinə nail olmaq üçün hər cür çirkin vasitələrdən istifadə edirlər.

Çox böyük təəssüf hissi ilə qeyd etmək lazımdır ki, hakimiyyəti qanunsuz yolla ələ keçirmək üçün göstərilən cəhdlərə iqtidarda təmsil olunan bir sıra şəxslər də qoşulmuşlar. Korrupsiyaya qurşanmış bəzi məmurların pozucu radikal müxalifətlə əlbir fəaliyyət göstərməsi üzə çıxarılmışdır. Qeyri-qanuni yollarla əldə etdikləri maliyyə vəsaitlərini sağlam siyasi rəqabət aparmağa qadir olmayan pozucu radikal müxalifətin çirkin siyasi niyyətlərinin həyata keçməsinə yönəldən bu şəxslərin ifşa olunmasını xalqımız böyük razılıq hissi ilə qarşılamışdır.

Azərbaycan Respublikasının Milli Məclisi ölkədə ictimai-siyasi sabitliyin daha da möhkəmləndirilməsi üçün görülən tədbirləri tamamilə bəyənir. Heç bir şübhə yoxdur ki, gələcəkdə də bu cür niyyətə düşə biləcək şəxslərin qanunsuz fəaliyyətinin qarşısı qətiyyətlə alınacaqdır. Heç bir qüvvə Azərbaycan Respublikasını seçdiyi demokratik inkişaf yolundan döndərə bilməz.

Azərbaycan Respublikasının Milli Məclisi əmin olduğunu bildirir ki, ölkədə ictimai-siyasi sabitliyin pozulmasına yol verilməyəcək, qanunun aliliyi təmin ediləcək, Azərbaycanda gedən quruculuq prosesləri uğurla davam etdiriləcəkdir.

Azərbaycan Respublikasının Milli Məclisi Azərbaycan xalqına müraciət edir ki, ölkədə yaranmış demokratik şəraitdən sui-istifadə etmək istəyən qüvvələrin niyyətlərinin həyata keçməsinə yol verməsin və Azərbaycan Respublikasının Prezidenti cənab İlham Əliyevin ətrafında daha sıx birləşsin.

(Bəyanat Azərbaycan Respublikası Milli Məclisinin

2005-ci il 28 oktyabr tarixli iclasında qəbul edilmişdir.)