AZƏRBAYCAN RESPUBLİKASI MİLLİ TƏHLÜKƏSİZLİK NAZİRİLİYİ İCTİMAİ ƏLAQƏLƏR MƏRKƏZİNİN MƏLUMATI
2005-ci il oktyabrın 1-də Biləsuvar şəhərində keçirilmiş əməliyyat-axtarış tədbirləri nəticəsində əvvəlcədən əlbir olaraq “İran-Azərbaycan” marşrutu ilə narkotik vasitələrin cinayətkar məqsədlərlə daşınmasını və satışını həyata keçirən qrup zərərsizləşdirilmişdir. Belə ki, Cəlilabad şəhər sakini, 1972-ci il təvəllüdlü Məmmədov Saməddin Qardaşxan oğluna məxsus avtomobil saxlanılmış, baxış zamanı arxa oturacağın altından narkotik vasitələr aşkarlanaraq götürülmüşdür.
Görülən tədbirlərlə oktyabrın 3-də qrupun digər üzvləri Bakı şəhəri, Lökbatan qəsəbə sakini, 1966-cı il təvəllüdlü Ağaşov İlqar Əziz oğlu və Salyan rayonu, Aşağı Kürkənd kənd sakini, 1970-ci il təvəllüdlü Bəhrəmov Vüqar Qoçu oğlu da saxlanılmışlar.
Uzun müddət cəzasızlıq şəraitində fəaliyyət göstərən, Salyan rayonunda narkotik vasitələrin qanunsuz dövriyyəsinə dırnaqarası nəzarət edən Vüqar Bəhrəmovun evinə baxış zamanı da narkotik vasitələr aşkar edilmişdir. Beləliklə, narkotiklərin qanunsuz dövriyyəsi ilə məşğul olan qrupun üzvlərindən ümumi çəkisi 2 kiloqram 338 qram narkotik vasitə, o cümlədən 1 kiloqram 316 qram tiryək və 381 qram heroin götürülmüşdür.
Faktla bağlı Azərbaycan Respublikası Baş Prokurorluğu tərəfindən Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin qacaqmalçılığı), 234.4.1-ci və 234.4.3-cü (qabaqcadan əlbir olan bir qrup şəxs tərəfindən qanunsuz olaraq külli miqdarda narkotik vasitələri, psixotrop maddələri və ya prekursorları hazırlama, istehsal etmə, saxlama, daşıma, göndərmə və ya satma) maddələri ilə cinayət işi başlanmış və istintaq edilməsi üçün Milli Təhlükəsizlik Nazirliyi İstintaq Baş İdarəsinin icraatına verilmişdir. İlqar Ağaşov, Vüqar Bəhrəmov və Saməddin Məmmədov təqsirləndirilən şəxs qismində cəlb edilərək məhkəmənin qərarı ilə barələrində həbs qətimkan tədbiri seçilmişdir.
Keçirilən digər tədbirlər nəticəsində cari il oktyabrın 5-də Bakı şəhərinin Nərimanov rayonu ərazisində 8 min ABŞ dolları nominalında saxta pul əskinaslarını satarkən Rusiya Federasiyasının vətəndaşı, 1981-ci il təvəllüdlü Levoçkin Andrey Vladimiroviç saxlanılmışdır. Faktla bağlı toplanılmış materiallar aidiyyəti üzrə Azərbaycan Respublikası Daxili İşlər Nazirliyinin Baş İstintaq və Təhqiqat İdarəsinə göndərilmiş, Cinayət Məcəlləsinin 204.2-ci (satış məqsədi ilə xeyli miqdarda saxta pul, qiymətli kağızlar hazırlama və satma) maddəsi ilə cinayət işi başlanılmış, Andrey Levoçkin təqsirləndirilən şəxs qismində cəlb edilərək məhkəmənin qərarı ilə barəsində həbs qətimkan tədbiri seçilmişdir.
Bu ilin sentyabrında “N” saylı hərbi hissənin ərazisində 3 ədəd raketin basdırıldığı barədə nazirliyə daxil olan məlumat əsasında həmin əraziyə baxış keçirilmişdir. Nəticədə 2 metr dərinlikdə basdırılmış, hər birinin çəkisi 360 kiloqram olan 3 ədəd “STRELA 10” tipli istilik raketi aşkarlanaraq götürülmüşdür. Araşdırmalarla həmin raketlərin 1990-1991-ci illərdə keçmiş SSRİ-nin həmin ərazidə dislokasiya olunmuş hərbi hissəsinin hərbçiləri tərəfindən basdırıldığı müəyyən edilmişdir.
Milli Təhlükəsizlik Nazirliyinin həyata keçirdiyi profilaktik tədbirlərlə ayrı-ayrı vətəndaşlarda qanunsuz saxlanılan silah-sursatın könüllü təhvil verilməsi prosesi də davam edir. Belə ki, cari il oktyabrın 6-da Balakən rayon sakinləri tərəfindən könüllü olaraq Milli Təhlükəsizlik Nazirliyinin rayon şöbəsinə bir ədəd AKMS, 6 ədəd əl qumbarası, 23 ədəd süngü bıçağı, 1 ədəd fişəng tapançası, 10 ədəd tapança və avtomat silah üçün xəzinə, minə yaxın müxtəlif çaplı patron və güllə təhvil verilmişdir.
Bölmənin digər xəbərləri
