Azərbaycan səfiri etimadnaməsini Birləşmiş Ərəb Əmirliklərinin vitse-prezidentinə təqdim edib
Əbu Dabi, 15 fevral, AZƏRTAC
Fevralın 15-də Azərbaycanın Birləşmiş Ərəb Əmirliklərindəki səfiri Daşqın Şikarov etimadnaməsini bu ölkənin vitse-prezidenti və Baş naziri, Dubayın Əmiri Əlahəzrət Şeyx Məhəmməd bin-Rəşid Əl-Maktuma təqdim edib.
Daşqın Şikarov Birləşmiş Ərəb Əmirliklərində səfir vəzifəsinə təyin olunmasından məmnunluğunu bildirib. O, fəaliyyəti müddətində Azərbaycan-Birləşmiş Ərəb Əmirlikləri əlaqələrinin daha da möhkəmləndirilməsində və inkişaf etdirilməsində əlindən gələni əsirgəməyəcəyini qeyd edib.
Səfir Prezident İlham Əliyevin salamlarını, dost Birləşmiş Ərəb Əmirliklərinin xalqına firavanlıq və rifah arzularını Birləşmiş Ərəb Əmirliklərinin Prezidenti Əlahəzrət Şeyx Xəlifə bin-Zayed Əl-Nəhyana, vitse-prezidenti və Baş naziri, Dubayın Əmiri Əlahəzrət Şeyx Məhəmməd bin-Rəşid Əl-Maktuma çatdırıb. O, Azərbaycanın dost Birləşmiş Ərəb Əmirlikləri ilə əməkdaşlığı bütün sahələrdə genişləndirmək niyyətində olduğunu bildirib.
Əlahəzrət Şeyx Məhəmməd bin-Rəşid Əl-Maktum Prezident İlham Əliyevin salamlarına və xoş arzularına görə minnətdarlığını bildirib. O, Prezident Əlahəzrət Şeyx Xəlifə bin-Zayed Əl-Nəhyanın da salamlarının dövlətimizin başçısına çatdırılmasını xahiş edib və dost Azərbaycan xalqına rifah arzulayıb.
Şeyx Məhəmməd bin-Rəşid Əl-Maktum, həmçinin səfirə yeni vəzifəsində uğurlar diləyib, fəaliyyəti müddətində ikitərəfli əlaqələrin inkişafında öz adından və başçılıq etdiyi federal hökumətin adından dəstək verməyə hazır olduğunu söyləyib.
Etimadnaməsini təqdim etdikdən sonra səfir D.Şikarov mərasimdə iştirak edən Birləşmiş Ərəb Əmirliklərinin xarici işlər naziri Şeyx Abdullah bin-Zayed Əl-Nəhyan ilə görüşüb.
Daşqın Şikarov Azərbaycanın xarici işlər naziri Elmar Məmmədyarovun salamlarını Şeyx Abdullah bin-Zayed Əl-Nəhyana çatdırıb, dost ölkədə səfir təyin olunmasından qürur hissi duyduğunu vurğulayıb. O, ölkələrimiz arasında mövcud əlaqələri daha yüksək səviyyəyə qaldırmaq üçün səylə çalışacağını qeyd edib.
Xarici işlər naziri azərbaycanlı həmkarının salamlarına görə təşəkkürünü bildirib. O, səfir D.Şikarova fəaliyyətində uğurlar arzulayıb, dost Azərbaycanla ikitərəfli əlaqələrin inkişafına dəstək verməyə hazır olduğunu diqqətə çatdırıb.
Asya Hacızadə
AZƏRTAC-ın xüsusi müxbiri
Əbu Dabi
Bölmənin digər xəbərləri
