Azərbaycan səfiri Kolumbiya Konqresində ölkəmizlə bağlı təqdimatla çıxış edib
Bakı, 28 sentyabr, AZƏRTAC
Azərbaycanın Kolumbiyadakı səfiri Məmməd Talıbov həmin ölkənin Konqresində Azərbaycanın tarixi, yaratdığı yeni reallıqlar, öz ərazi bütövlüyünü bərpa etməsinin vacibliyi, eləcə də Azərbaycan-Kolumbiya münasibətlərinin inkişaf perspektivlərinə dair geniş təqdimatla çıxış edib.
AZƏRTAC xəbər verir ki, Kolumbiya Konqresinin hər iki palatasının -Senat və Nümayəndələr Palatasının iştirakı ilə keçirilən görüşdə Azərbaycanın dövlətçilik tarixinə nəzər salınıb, müsəlman Şərqində ilk parlamentli respublika, hüquqi və dünyəvi dövlət olan Azərbaycan Xalq Cümhuriyyətinin mövcud olduğu qısa müddət ərzində həyata keçirdiyi demokratik dövlət quruculuğu tədbirlərinin əhəmiyyətinə toxunulub. 1991-ci ildə yenidən müstəqilliyini əldə etdikdən sonra müxtəlif sosial-iqtisadi, siyasi problemlərlə, həmçinin erməni işğalının ağır nəticələri üzləşən Azərbaycanın Ümummilli Lideri Heydər Əliyevin xilaskarlıq missiyası və uzaqgörən daxili-xarici siyasəti nəticəsində öz müstəqilliyini qoruyub saxlamaqla yanaşı, dinamik və özünəməxsus inkişaf yoluna qədəm qoyduğu diqqətə çatdırılıb. Bu gün regionun ən aparıcı dövlətlərindən biri olan Azərbaycanın Avropa ilə Asiya arasında körpü rolunu oynadığı, bölgənin enerji xəritəsini bütünlüklə dəyişərək mühüm nəqliyyat və enerji mərkəzinə çevrildiyi bildirilib.
Görüşdə Ermənistanın işğalçılıq siyasəti və onun nəticələri, Azərbaycan ərazilərində həyata keçirdiyi etnik təmizləmə və vandalizm əməlləri barədə danışılıb, 2020-ci ildə 44 günlük şanlı Vətən müharibəsinin nəticəsi kimi bu işğala son qoyularaq tarixi ədalətin bərpa olunduğu vurğulanıb. Lokal xarakterli antiterror tədbirlərinin görülməsini şərtləndirən səbəblər, Azərbaycanın ərazi bötüvlüyünü bərpa etməklə tarixi Zəfərə imza atması, Qarabağın erməni sakinlərinin ölkəmizin konstitusiya çərçivəsinə reinteqrasiyası istiqamətində atılan addımlar, eləcə də işğaldan azad edilmiş ərazilərdə həyata keçirilən genişmiqyaslı bərpa-quruculuq işləri barədə ətraflı məlumat verilib.
Eyni zamanda, Azərbaycanlı diplomatın çıxışı zamanı Kolumbiya ilə qarşılıqlı hörmət və dostluq əsasında qurulmuş münasibətlərin səviyyəsindən məmnunluq ifadə olunub, keçmiş münaqişə ilə bağlı tutduğu ədalətli mövqeyə görə Kolumbiya Hökumətinə bir daha təşəkkür edilib. Konqresin Nümayəndələr Palatasının Kolumbiya-Azərbaycan parlamentlərarası dostluq qrupunun yeni üzvlərinə təbriklər çatdırılıb, parlament diplomatiyasının və parlamentlərarası münasibətlərin ölkələrimiz arasında əlaqələrin inkişafına mühüm töhfə verəcəyinə inam ifadə olunub. İki ölkə arasında müxtəlif sahələrdə əməkdaşlıq əlaqələrinin daha da inkişafı üçün geniş potensial olduğu bildirilib, o cümlədən Kolumbiya şirkətləri işğaldan azad edilmiş ərazilərdə bərpa və quruculuq işlərinə dəvət olunublar.
Senator Xose Peres çıxış edərək Azərbaycana səfərini, ölkə Prezidenti ilə görüşünü böyük məmnunluqla xatırlayaraq, ölkəmizdə şahidi olduğu sosial-iqtisadi inkişafdan və Azərbaycan xalqının qonaqpərvərliyindən çox təsirləndiyini qeyd edib. Senator Sakit Okean Alyansında müşahidəçi dövlət qismində iştirak edən Azərbaycanın tezliklə təşkilatın xüsusi sessiyasına ev sahibliyi edəcəyinə ümidvar olduğunu bildirib.
Daha sonra digər senatorlar və Nümayəndələr Palatasının üzvləri də söz alaraq, Azərbaycanın ərazi bütövlüyünü bərpa etməsini, Qarabağın erməni əhalisinin ölkəmizin konstitusiyası və qanunları çərçivəsində Azərbaycan cəmiyyətinə reinteqrasiyasını alqışladıqlarını, Kolumbiyanın ölkəmizlə münasibətlərin inkişafına önəm verdiyini və xüsusilə Azərbaycanın münaqişələrin idarə edilməsi təcrübəsinin öyrənilməsinin faydalı olduğunu qeyd ediblər. Kolumbiyalı parlamentarilər Azərbaycanın iqtisadi sahədə əldə etdiyi nailiyyətlərin, eləcə də qeyri-neft sektorunun inkişafına ayrılan diqqətin təqdirəlayiq olduğunu bildiriblər.
Görüşdə, həmçinin təhsil, idman, mədəniyyət, turizm, kənd təsərrüfatı və humanitar sahələrdə ikitərəfli əməkdaşlığın inkişaf etdirilməsi barədə fikir mübadiləsi aparılıb, iqtisadi sahədə əlaqələrin daha da genişləndirilməsi üçün böyük potensialın mövcud olduğu və iki ölkə arasında ticarət dövriyyəsinin artırılması üçün səylərin gücləndirilməsinin vacibliyi qeyd olunub.
Sonda səfir M.Talıbov tərəfindən ölkəmizdə və regionda cərəyan edən hadisələrlə bağlı auditoriyada maraq doğuran suallar cavablandırılıb, Kolumbiya Konqresinin rəsmi televiziyasına Azərbaycan həqiqətləri ilə bağlı müsahibə verilib.
Görüş Konqresin yutub kanalı vasitəsilə canlı yayımlanıb.
Bölmənin digər xəbərləri
