Azərbaycan Tarixi Muzeyində Yusif Ağayevin kitabının təqdimatı olub
Bakı, 26 oktyabr, AZƏRTAC
Azərbaycan Tarixi Muzeyində Yusif Ağayevin “Dahi Azərbaycan şairi Nizami Gəncəvinin yaradıcılığında XI-XIII əsrlərin hərb sənəti” kitabının təqdimatı olub.
AZƏRTAC xəbər verir ki, Ağayevin kitabında dahi şairin XI-XIII əsrlərin hərb tarixinə dair dəqiq və dolğun məlumatların yer aldığı şeirlər təsvir olunur.
Nizaminin əsərlərində silah növləri, qoşunların döyüş birləşmələri, hərbi strategiya və taktika, hərbi hüquq və təlim təsvir edilib. Nizami Gəncəvinin əsərləri Azərbaycanın orta əsrlər tarixi, coğrafiyası, etnoqrafiyası, elmi və mədəniyyəti haqqında məlumatları özündə əks etdirən əvəzsiz mənbələrdir.
Tədbiri giriş sözü ilə Azərbaycan Tarixi Muzeyinin direktoru, akademik Nailə Vəlixanlı açıb. O, Azərbaycanın hərb tarixinin öyrənilməsinin və təbliğinin vacibliyini vurğulayaraq, müxtəlif mənbələrə müraciət etməyin xüsusi əhəmiyyətini qeyd edib.
Tarix üzrə fəlsəfə doktoru, dosent Səbuhi Əhmədov da qeyd edib ki, Yusif Ağayev elmi-populyar kitab və məqalələri ilə geniş tanınır. Onun “Babam Qorqudun kitabı” və “Koroğlu” əsərlərində hərbi mövzulara dair araşdırmaları həm alimlərin, həm də geniş ictimaiyyətin diqqətini cəlb edib. Vurğulanıb ki, Azərbaycanın hərb tarixinin şanlı səhifələrinə həsr olunmuş əsərlər vətənpərvərlik ruhunun tərbiyəsində xüsusi rol oynayır və bu mənada Ağayevin yeni kitabı xüsusi əhəmiyyət kəsb edir.
Ağayev AZƏRTAC -ın müxbiri ilə söhbətində kitab üzərində işlərin necə getdiyindən danışıb:
“Mən uzun müddət Qazaxıstanda və Rusiyada oxuyub işləmişəm, lakin SSRİ dağılandan sonra Qarabağa qayıdıb müharibədə iştirak etmişəm. Mən çox vaxt opponentlərdən eşidirdim ki, guya döyüşkənlik ruhu Azərbaycan xalqına xas deyil. Bu stereotipi dağıtmaq üçün hərb sənət tarixinə müraciət etdim və araşdırmalarıma başladım. Xüsusilə dahi şairimiz Nizami Gəncəvinin məhəbbət və mənəviyyat mövzuları ilə yanaşı hərbi sənətin də əks olunduğu əsərləri məni cəlb etdi. Mən bütün dünyaya xalqımın dərin və qədim hərbi mükəmməllik ənənəsinə malik olduğunu göstərməyə çalışıram. Bu irslə daha yaxından tanış olmaq istəyən hər kəs təkcə Nizaminin əsərlərinə müraciət etsə kifayət edər”.
Yusif Ağayev araşdırma zamanı qarşılaşdığı çətinliklərdən də danışıb.
“Ən böyük çətinlik Nizaminin qədim fars dilində yazması idi. Azərbaycan, rus və türk dillərinə tərcümələrdə çox vaxt qeyri-dəqiqliklər olur ki, bu da çox vaxt mübahisələrə səbəb olur. Araşdırmalarımda mətnin mənasını dəqiq çatdırmaq mənim üçün vacib idi, buna görə də onun dərinliyini və həqiqiliyini qorumaq üçün tərcümələrin seçiminə diqqətlə yanaşmışam”, - deyə o bildirib.
Tədbirdə Müdafiə Nazirliyinin Həzi Aslanov adına Ordu İdeoloji və Mədəniyyət Mərkəzinin mahnı və rəqs ansamblı tərəfindən “Qılıncla rəqs” və “Gəncə” rəqsləri nümayiş etdirilib. Nizami Gəncəvinin şeirləri əsasında “Sevgili canan” və “Sənsiz” romansları da ifa olunub.
Həmçinin “Azərbaycan Televiziya və Radio Verilişləri” QSC-nin layihəsi – AzTV kanalı, Türkiyənin “İkinci Yeni Film Production” şirkəti və Azərbaycanın “Shahdag Film Production” şirkəti ilə birgə ərsəyə gətirdiyi “Azərbaycan Atabəyləri” serialı haqqında da məlumat verilib. “Shahdag Film Production” şirkətinin direktoru İlqar Mehdi müasir şəraitdə hərbi təbliğatın gücləndirilməsinin vacibliyini qeyd edərək, elmi əsaslı bədii və sənədli filmlərin güclü təbliğat vasitəsi olduğunu deyib.
Tədbirin sonunda qonaqlara müəllifin imzası olan kitablar təqdim olunub.
Bölmənin digər xəbərləri
