ELM VƏ TƏHSİL
AZƏRBAYCAN-TÜRKİYƏ ÖZƏL LİTSEYLƏRİNİN BURAXILIŞ GECƏSİ KEÇİRİLMİŞDİR
AZƏRTAC-ın müxbiri xəbər verir ki, əvvəlcə respublikanın əməkdar artisti Ağadadaş Ağayevin ifasında “Heydər “xalqım” deyəcək, xalq “Heydər” söyləyəcək” mahnısının müşayiəti ilə ümummilli liderimizin həyatından bəhs edən “Səni unutmadıq, unutmayacağıq...” qısametrajlı filmi nümayiş etdirilmiş, əbədi Prezidentimizin, azadlığımız və müstəqilliyimiz uğrunda qurban getmiş şəhidlərin xatirəsi bir dəqiqəlik sükutla yad edilmiş, Azərbaycan Respublikasının Dövlət himni, Türkiyə Cümhuriyyətinin İstiqlal marşı ifa olunmuşdur.
Sonra gecənin iştirakçılarına - Azərbaycan hökumətinin üzvlərinə, Milli Məclisin deputatlarına, nazirlik, dövlət komitələri və digər qurumların təmsilçilərinə, təhsil işçilərinə, o cümlədən müxtəlif ali məktəblərin nümayəndələrinə, iş adamlarına, valideynlərə Azərbaycan-Türkiyə özəl litseylərinin fəaliyyəti haqqında məlumat verilmişdir. Qeyd olunmuşdur ki, bu təhsil ocaqları həyata xalqımızın böyük oğlu, “Çağ” Öyrətim İşlətmələri Şirkətinin fəxri baş müəllimi Heydər Əliyevin xeyir-duası ilə vəsiqə almışdır. Həmin litseylər onun adı ilə yaşayır, onun adını yaşadırlar. Pedaqoji kollektivlər onun vəsiyyətlərinə əməl etmək üçün səylərini əsirgəmirlər. Şirkətin Bakı, Sumqayıt, Gəncə, Lənkəran, Quba, Əli Bayramlı, Şəki və Ağdaşdakı litseylərindən əlavə, Bakıda “Araz” hazırlıq kursları, Qafqaz Universiteti fəaliyyət göstərir. Onların hamısı müasir tədris avadanlığı ilə təmin edilmişdir. Müəllimlərin 60 faizi, şagirdlərin isə, demək olar, hamısı Azərbaycan vətəndaşlarıdır. Litseylərin şagirdləri beynəlxalq fənn olimpiadalarında 107, o cümlədən 25 qızıl, 36 gümüş, 146 bürünc medal qazanmışlar. 2002-2003-cü dərs ilində Dədə Qorqud özəl türk litseyinin 34 məzunundan 33-ü, Bakı özəl türk litseyinin 79 məzunundan 78-i, Əli Bayramlı, Quba, Lənkəran, Mingəçevir, Sumqayıt, Şəki özəl türk litseyinin məzunlarının hamısı ali məktəblərə qəbul olunmuşdur. Hazırda məzunların 68 faizi Azərbaycanda, 32 faizi dünyanın 23-dən çox ölkəsində təhsil almaqdadır.
Bu il Azərbaycan-Türkiyə özəl litseylərini 360 nəfər bitirir.
Gecədə təhsil naziri Misir Mərdanov, “Çağ” Öyrətim İşlətmələri Şirkətinin prezidenti Ənvər Özərən, Azərbaycan-Türkiyə özəl litseyləri baş idarəsinin rəisi Məsud Ata çıxış etmişlər.
Müxtəlif beynəlxalq fənn olimpiadalarında qızıl medal qazanmış şagirdlər Azərbaycanın dövlət bayrağını təntənəli şəkildə indən belə respublikamızı mötəbər bilik yarışlarında təmsil edəcək yaşıdlarına təhvil vermişlər. Məzunlar bayrağın önündə diz çökərək onu öpmüşlər.
Litseylərin şagirdləri maraqlı konsert proqramı nümayiş etdirmişlər. Bütün musiqi nömrələrini respublikanın xalq artisti, professor Rauf Abdullayevin rəhbərliyi və dirijorluğu ilə Üzeyir Hacıbəyov adına Azərbaycan Dövlət simfonik orkestri ifa etmişdir.