Azərbaycan-Türkmənistan əməkdaşlığı Orta Dəhlizin strateji imkanlarını genişləndirir – ŞƏRH
Bakı, 25 iyun, AZƏRTAC
Azərbaycan ilə Türkmənistan arasında nəqliyyat, logistika və tranzit sahələrində əməkdaşlığın genişlənməsi Orta Dəhlizin inkişafında yeni mərhələnin başlanğıcı kimi qiymətləndirilir. İki ölkə arasında son dövrdə intensivləşən siyasi dialoq, nəqliyyat infrastrukturu üzrə birgə təşəbbüslər və Xəzər hövzəsində əlaqələrin gücləndirilməsi regionun beynəlxalq yükdaşımalar sistemində rolunu artırır.
Bu fikirləri AZƏRTAC-a açıqlamasında nəqliyyat üzrə ekspert Rauf Ağamirzəyev bildirib.
Onun sözlərinə görə, Azərbaycan və Türkmənistan Xəzər regionunda yalnız coğrafi baxımdan deyil, həm də logistika imkanları və tranzit potensialı baxımından bir-birini tamamlayan tərəfdaşlardır.
“Orta Dəhlizin rəqabət qabiliyyətinin yüksəldilməsi üçün Xəzər üzərindən daşımaların sürətli, çevik və dayanıqlı şəkildə təşkili əsas şərtlərdən biridir. Bu baxımdan Azərbaycan və Türkmənistan limanları arasında mövcud ən qısa məsafə mühüm üstünlük yaradır. Bu marşrut təkcə iki ölkə arasında yükdaşımaları deyil, bütövlükdə Avropa ilə Mərkəzi Asiya arasında ticarət dövriyyəsinin optimallaşdırılmasını təmin edir. Xəzər üzərindən səmərəli əlaqələrin qurulması Orta Dəhlizin gələcək inkişafını müəyyən edən əsas amillərdəndir. Son dövrdə Azərbaycan və Türkmənistan arasında yüksəksəviyyəli siyasi təmaslar iqtisadi əməkdaşlığın dərinləşməsi üçün əlavə imkanlar yaradıb. Türkmənistan Prezidenti Sərdar Berdiməhəmmədovun Azərbaycana rəsmi səfəri çərçivəsində keçirilən görüşlər nəqliyyat, logistika, ticarət və Xəzər hövzəsində əməkdaşlığın genişləndirilməsi istiqamətində yeni perspektivlər açıb”, – deyə R.Ağamirzəyev qeyd edib.
R.Ağamirzəyevin fikrincə, dövlət başçıları səviyyəsində formalaşan qarşılıqlı etimad iri infrastruktur layihələrinin daha sürətli həyata keçirilməsinə və regional inteqrasiyanın güclənməsinə şərait yaradır. Ekspert qeyd edib ki, nəqliyyat əlaqələrinin genişləndirilməsi yalnız quru marşrutları ilə məhdudlaşmır: “Xəzər dənizində dəniz daşımalarının gücləndirilməsi də bu prosesin vacib hissəsidir. Bu baxımdan Azərbaycan gəmiqayırma sənayesinin yeni məhsulu olan “Dostlug” neftdaşıyan tankerinin beynəlxalq istismara çıxması mühüm hadisə hesab olunur. Bakı Gəmiqayırma Zavodunda inşa edilən və Türkmənistan istiqamətində istismara verilən tanker iki ölkə arasında dəniz logistikasının genişləndirilməsi baxımından simvolik və praktik əhəmiyyət daşıyır. “Dostlug” tankerinin fəaliyyətə başlaması Xəzərdə yük və enerji daşımalarının genişləndirilməsi, limanlar arasında koordinasiyanın artırılması və dəniz nəqliyyatının səmərəliliyinin yüksəldilməsi istiqamətində vacib addımdır. Bu cür layihələr gələcəkdə yeni yük axınlarının regiona cəlb olunmasına şərait yarada bilər”.
R.Ağamirzəyev əlavə edib ki, Orta Dəhlizin dayanıqlılığı yalnız nəqliyyat xətlərinin mövcudluğu ilə deyil, eyni zamanda onların modernləşdirilməsi və inteqrasiyası ilə ölçülür.
“Bu baxımdan limanların genişləndirilməsi, dəmir yolu sistemlərinin yenilənməsi, rəqəmsal logistika həllərinin tətbiqi və multimodal daşımaların inkişafı əsas istiqamətlərdən hesab olunur. Azərbaycanın Xəzərin qərb sahilində, Türkmənistanın isə şərq sahilində yaratdığı infrastruktur gələcəkdə regionun daha böyük həcmdə tranzit yükləri qəbul etməsinə imkan verəcək. Azərbaycan-Türkmənistan tərəfdaşlığının dərinləşməsi yaxın illərdə Orta Dəhlizin qlobal ticarət marşrutları arasında mövqeyini gücləndirəcək və Xəzər regionunu Avropa ilə Asiya arasında əsas logistika mərkəzlərindən birinə çevirəcək”, - deyə ekspert əlavə edib.
Bölmənin digər xəbərləri
