Azərbaycan və İsveçrə arasında təhsil sahəsində əməkdaşlıq genişlənir
Bakı, 15 fevral (AZƏRTAC). Fevralın 15-də təhsil naziri Misir Mərdanov İsveçrənin Azərbaycandakı səfiri xanım Sabine Ulmann Şaban, İsveçrə İnkişaf və Əməkdaşlıq Təşkilatının Cənubi Qafqaz üzrə regional direktorunun müavini Matias Feldman ilə görüşmüşdür.
Təhsil Nazirliyindən AZƏRTAC-a bildirmişlər ki, Misir Mərdanov ötən ilin dekabrında rəhbərlik etdiyi nümayəndə heyətinin İsveçrə Konfederasiyasına səfərinin uğurlu olduğunu, keçirilən görüşlərdə iki ölkə arasında təhsil sahəsindəki əməkdaşlığın genişləndirilməsi istiqamətində müzakirələr aparıldığını və əlaqələrin inkişafı üçün səmərəli imkanların mövcudluğunu vurğulamışdır.
Səfər barədə ətraflı məlumat verən təhsil naziri İsveçrənin təhsil və tədqiqat məsələləri üzrə dövlət katibi ilə görüşdə iki ölkənin ali təhsil müəssisələri arasında əlaqələrin yaradılması, İsveçrədə təhsil alan azərbaycanlı gənclərin sayının artırılması, tələbə, müəllim və tədqiqatçıların mübadiləsi, ümumi orta, habelə peşə təhsili müəssisələri arasında əlaqələrin qurulması barədə söhbət aparıldığını, İsveçrənin təhsil və tədqiqat məsələləri üzrə dövlət katibinin Azərbaycana dəvət olunduğunu qeyd etmişdir. Rəhbərlik etdiyi nümayəndə heyətinin İsveçrənin bir neçə ali və orta təhsil müəssisələri ilə tanış olduğunu, bu ölkənin ali məktəblərində təhsil alan azərbaycanlı gənclərlə görüşdüyünü diqqətə çatdıran M.Mərdanov ümumilikdə səfərdən razılığını bildirmiş, bu səfərin təhsil sahəsində təşəkkül tapmış ikitərəfli əlaqələrin inkişafına təkan verəcəyinə inamını ifadə etmişdir.
Təhsil Nazirliyinin nəzdindəki 6 nömrəli məktəb-liseydə Beynəlxalq Bakalavriat Proqramı üzrə tədrisə başlanıldığını söyləyən nazir, bu işin Berndəki müvafiq qurumun dəstəyi ilə həyata keçirildiyini və isveçrəli mütəxəssislərin bununla bağlı Azərbaycanda olduqlarını bildirmişdir.
İsveçrə ilə Azərbaycan arasında mövcud olan əlaqələrdən söz açan xanım Sabine Ulmann Şaban təhsil sahəsində əməkdaşlığın daha da genişləndirilməsinin önəminə diqqət çəkmiş, həmçinin təhsil nazirinin rəhbərlik etdiyi nümayəndə heyətinin İsveçrə Konfederasiyasına səfərinin uğurlu olmasından məmnunluğunu ifadə etmişdir.
Sonra səfir təhsilin doktorantura səviyyəsi üzrə təqaüd proqramı haqqında məlumat verərək azərbaycanlı tələbələrin bu proqramdan istifadə imkanlarının olduğunu bildirmişdir. Diplomat tələbələrin müvafiq proqram haqqında məlumatlandırılması üçün ölkəmizin ali məktəblərində görüşlər keçirilməsinin nəzərdə tutulduğunu da demişdir.
İki ölkənin təhsil əlaqələrinin daha da inkişaf etdirilməsini müsbət hal kimi dəyərləndirən xanım Sabine Ulmann Şaban peşə təhsili sahəsində əməkdaşlığın yaradılması məsələsinə də toxunmuşdur.
İsveçrə İnkişaf və Əməkdaşlıq Təşkilatının Cənubi Qafqaz üzrə regional direktorunun müavini Matias Feldman peşə təhsili üzrə əlaqələrin qurulması, xüsusilə kənd təsərrüfatı sahəsində peşə təliminin təşkili istiqamətində əməkdaşlığın yaradılması təklifi ilə çıxış etmişdir. Qonaq müvafiq işin fermerlərin xidmət səviyyəsinin artırılmasına, kənd təsərrüfatı sektorunda çalışan insanların təhsilə cəlb edilməsinə, ümumilikdə, kənd təsərrüfatı sahəsinin inkişafına təkan verəcəyini açıqlamışdır.
Misir Mərdanov səfirin qeyd etdiyi təqaüd proqramının əhəmiyyətini vurğulayaraq əvvəlcə bununla bağlı ilkin hazırlıq işinin aparılmasının və daha sonra Təhsil Nazirliyində təqdimat keçirilməsinin əhəmiyyətini qeyd etmiş, peşə təhsili sahəsinin Azərbaycan Prezidentinin rəhbərliyi ilə həyata keçirilən siyasətdə prioritet təşkil etdiyini bildirərək mövcud istiqamətdə görülən işlər barədə qonaqlara məlumat vermişdir. Bu istiqamətdə yeni layihələrin həyata keçirilməsinə dəstək veriləcəyini diqqətə çatdıran nazir, həmçinin Təhsil Nazirliyinin nəzdindəki 6 nömrəli məktəb-liseylə İsveçrənin müvafiq ümumi təhsil müəssisəsi arasında “Qardaşlaşmış məktəblər” layihəsi çərçivəsində əlaqələrin yaradılması təklifini irəli sürmüşdür.
Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.
Bölmənin digər xəbərləri
