“AZƏRBAYCAN VOLLEYBOLÇULARI” AVROPA KUBOKUNUN SAHİBİDİRLƏR
Martın 10-da İdman oyunları sarayında qadınlar arasında voleybol üzrə Avropa “Top-komanda” kuboku uğrunda final görüşü olmuşdur.
Final görüşündən əvvəl üçüncü yer uğrunda yarış keçirildi.
Polşanın “Bank poctovi” komandası ilə Avstriyanın “Telekom” komandası arasında keçən bu görüş isə 3:2 hesabı ilə polşalıların xeyrinə başa çatdı.
Almaniyanın, İsveçrənin, Rusiyanın, Ukraynanın, Bolqarıstanın, Polşanın güclü komandalarını məğlub edən Azərbaycanın “Azərreyl” komandası finalda Yuqoslaviyanın “Yedinstvo” komandası ilə qarşılaşdı. Maraqlı və gərgin keçən görüşdə voleybolçu qızlarımız rəqiblərinə 3:0 /25:13, 25:15, 25:13/ hesabı ilə qalib gələrək Avropa kubokunun sahibi oldular.
Voleybolçu qızlarımızın tam üstünlüyü şəraitində keçən bu gərgin görüşü izləyən minlərlə tamaşaçı güclü rəqibdən açıq-aşkar üstün olan və yüksək ustalıq nümayiş etdirən “Azərreyl” voleybolçularının qələbəsini “Azərbaycan voleybolçularına eşq olsun!”, “Azərbaycan idmanının ən böyük qayğıkeşi Prezident Heydər Əliyevə eşq olsun!” nidaları ilə, hərarətli alqışlarla qarşıladılar.
Həlledici görüşün gedişini izləyən Milli Olimpiya Komitəsinin prezidenti, Milli Məclisin deputatı İLHAM ƏLİYEV oyun başa çatdıqdan sonra Azərbaycan televiziyasına qısa müsahibə verdi.
JURNALİST: İlham müəllim, bu, gözəl qələbə münasibətilə sizi təbrik edirik. Bu gün voleybolçularımız yüksək ustalıq nümayiş etdirərək Avropa kubokuna sahib oldular.
İLHAM ƏLİYEV: Bəli. Mən də sizi təbrik edirəm, bütün tamaşaçıları təbrik edirəm. Biz inanırdıq ki, bu kuboka sahib olacağıq. İdmançılarımız bütün mərhələlərdə çox gözəl oyun nümayiş etdirdilər, xüsusilə yarımfinalda. Bu gün isə finalda güclü Yuqoslaviya komandasına 3:0 hesabı ilə qalib gəldilər. Biz kubokun sahibi olduq. Kubok Azərbaycana gəlibdir. Bilirsiniz ki, bir neçə gün bundan əvvəl demişdik ki, biz bu kuboku Azərbaycanda saxlayacağıq.
SUAL: Artıq bu kubok bizimdir. Gələcəkdə bizi daha böyük yarışlar, olimpiya oyunları, Avropa və dünya çempionatları gözləyir. Bu barədə nə deyə bilərsiniz, voleybolçularımız olimpiya oyunlarına vəsiqə əldə edə biləcəklərmi?
CAVAB: Əlbəttə, çalışacaqlar ki, vəsiqə əldə etsinlər. Hesab edirəm, imkanlar vardır. Ümumiyyətlə, idmanın bugünkü səviyyəsi göz qabağındadır. Bu gün burada 4 mindən artıq tamaşaçı var. Ən önəmli hal odur ki, biz tamaşaçıları, bütün millətimizi sevindiririk. İdman elə bir sahədir ki, hər kəsi maraqlandırır, hər kəs istəyir ki, onun milləti, xalqı qələbə qazansın. Mən çox şadam. Sizi bir daha təbrik edirəm, bütün tamaşaçıları təbrik edirəm. Yeni-yeni qələbələrə doğru!
X X X
MOK-un prezidenti İlham Əliyev “Azərreyl”in baş məşqçisi Faiq Qarayevlə, komandanın üzvləri Alla Həsənova, Oksana Parxomenko, Yelena Şabovta, İrina Smyagina, Yelena Parxomenko, Marina Kuzmina, Alla Teterina, Oksana Məmmədyarova, İnessa Qorxmaz, Valeriya Korotenko, İlahə Ağayeva, Səbinə Əjdərova ilə səmimi görüşdü, onları bu böyük uğur, qələbə münasibətilə təbrik etdi.
Sonra Avropa “Top-komanda” kuboku yarışının bağlanış mərasimi oldu.
Azərbaycan Voleybol Federasiyasının prezidenti Ziya Məmmədov, “Azərreyl” komandasının baş məşqçisi Faiq Qarayev idmançılara, o cümlədən voleybolçulara göstərdikləri diqqət və qayğıya görə dövlətimizin başçısı Heydər Əliyevə, MOK-un prezidenti İlham Əliyevə dərin minnətdarlıqlarını bildirdilər, bu qələbənin əldə olunmasında onların verdikləri böyük dəstəyi və köməyi yüksək qiymətləndirdilər.
Avropa Voleybol Federasiyasının \AVF\ vitse-prezidenti Yan Troniq Azərbaycan Milli Olimpiya Komitəsinin prezidenti İlham Əliyevə AVF-nin xatirə medalını təqdim etdi. O, Bakıda final yarışının yüksək səviyyədə təşkil olunduğunu bildirdi, təmsil etdiyi federasiya adından bütün iştirakçıları təbrik etdi və Avropa kubokunu “Azərreyl”in kapitanı Alla Həsənovaya təqdim etdi. Komandamızın üzvlərinə qızıl medallar və diplomlar verildi, qələbə rəmzi olan dəfnə çələngi təqdim edildi.
Azərbaycanın bayrağı qaldırıldı və dövlət himni əzəmətlə səsləndi.
İkinci, üçünçü yerləri tutmuş komandalara da medallar təqdim olundu.
Voleybolçu qızlarımız tribunaya qalxaraq MOK-un prezidenti İlham Əliyevə dərin təşəkkürlərini bildirdilər və onunla xatirə şəkli çəkdirdilər.
“Azərreyl” komandasını bir daha təbrik edir, onlara qarşıdakı yarışlarda uğurlar diləyirik.
Bölmənin digər xəbərləri
