CÜMHURİYYƏT - 100
Azərbaycan Xalq Cümhuriyyəti milli tariximizin parlaq səhifəsidir
Bakı, 29 may, AZƏRTAC
Mayın 29-da Pirallahı Rayon İcra Hakimiyyəti və Yeni Azərbaycan Partiyası Pirallahı rayon təşkilatının birgə təşkilatçılığı ilə Azərbaycan Xalq Cümhuriyyətinin 100 illik yubileyinə həsr olunan “Cümhuriyyət 100” adlı tədbir keçirilib.
AZƏRTAC xəbər verir ki, tədbir Azərbaycan Respublikasının dövlət himninin səsləndirilməsi ilə başlayıb.
Çıxış edən YAP Pirallahı rayon təşkilatının sədri Hikmət Şikarov müasir Azərbaycan Respublikasının varisi, Şərqin ilk demokratik müsəlman dövləti olan Azərbaycan Xalq Cümhuriyyətinin mürəkkəb bir dövrdə qurulduğunu və çox çətin şəraitdə fəaliyyət göstərdiyini bildirib. Azərbaycan Xalq Cümhuriyyətinin milli tariximizin parlaq səhifəsi olduğunu deyən Hikmət Şikarov qeyd edib ki, Azərbaycan xalqının və milli dövlətçiliyinin tarixində özünəməxsus yer tutan Cümhuriyyət öz üzərinə götürdüyü çətin vəzifəni yerinə yetirərək milli tələblərə və demokratik prinsiplərə uyğun dövlət orqanları formalaşdırıb, ölkənin ərazi bütövlüyünün və milli təhlükəsizliyinin təmin edilməsinə, qısa müddətdə yüksək döyüş qabiliyyətli ordunun yaranmasına nail olub.
Daha sonra çıxış edən Pirallahı Rayon İcra Hakimiyyəti başçısının müavini Anara Hacıbəyli Azərbaycan Xalq Cümhuriyyətinin yaranmasın dövlətçilik ənənələrimizin bərpasında, dirçəlməsində mühüm hadisə olduğunu bildirib. Diqqətə çatdırıb ki, gərgin diplomatik mübarizə şəraitində yaranmış Azərbaycan Xalq Cümhuriyyəti milli dövlətçilik tariximizdə silinməz izlər qoyub, xalqın qəlbində azadlıq və istiqlal duyğularını gücləndirməklə ölkəmizin gələcək müstəqilliyi üçün etibarlı zəmin yaradıb.
Çıxış edən “Səs” qəzetinin baş redaktoru Bəhruz Quliyev bildirib ki, Azərbaycan Xalq Cümhuriyyəti cəmi 23 ay fəaliyyət göstərməsinə baxmayaraq, həyata keçirilən tədbirlər müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından mühüm əhəmiyyət kəsb edib. Demokratik hüquq və azadlıqların bərqərar olması, etnik və dini mənsubiyyətdən asılı olmayaraq bütün vətəndaşların bərabər hüquqlarının tanınması, hətta bir çox Avropa ölkələrindən daha əvvəl qadınlara seçki hüququnun verilməsi, Azərbaycan dilinin dövlət dili elan edilməsi, təhsil və mədəniyyətin inkişafına xüsusi diqqət göstərilməsi, nizami milli ordunun, təhlükəsizlik strukturlarının qurulması və sair işlər Azərbaycan Xalq Cümhuriyyəti hökumətinin yürütdüyü siyasətin miqyasını, mahiyyət və mənasını əyani şəkildə səciyyələndirir.
Sonda keçirilən tədbirlərin yekunu kimi ulu öndər Heydər Əliyevin anadan olmasının 95 illiyi və Azərbaycan Xalq Cümhuriyyətinin yaranmasının 100 illiyi ilə əlaqədar Pirallahı Rayon İcra Hakimiyyəti və Yeni Azərbaycan Partiyası Pirallahı rayon təşkilatının birgə təşkilatçılığı ilə hazırlanmış videoçarx nümayiş olunub.
“Cümhuriyyət-100” adlı layihə çərçivəsində 350-dən çox gəncin iştirakı ilə Azərbaycan Respublikasının dövlət bayrağı canlandırılıb, “Cümhuriyyət-100” sözü yazılıb və ulu öndər Heydər Əliyevin canlı imzası yaradılıb.
Sonda bir qrup şəxs partiyanın ictimai-siyasi həyatında fəal iştirakına görə YAP Pirallahı rayon təşkilatının Fəxri fərmanları ilə təltif olunublar.