CÜMHURİYYƏT - 100
Azərbaycan Xalq Cümhuriyyətinin 100 illiyi münasibətilə Mərakeşdə rəsmi qəbul təşkil olunub
Bakı, 14 may, AZƏRTAC
Azərbaycan Respublikasının Mərakeş Krallığındakı səfirliyi Azərbaycan Xalq Cümhuriyyətinin (AXC) 100 illiyi münasibətilə rəsmi qəbul təşkil edib.
Səfirlikdən AZƏRTAC-a bildiriblər ki, tədbirdə Mərakeş rəsmiləri, Rabatda akkreditə olunmuş diplomatik korpusun və beynəlxalq təşkilatların əməkdaşları, ISESCO-nun nümayəndələri, Mərakeş-Azərbaycan Dostluq Cəmiyyətinin üzvləri, jurnalistlər, yerli incəsənət xadimləri, iş adamları iştirak ediblər.
Tədbirin keçirildiyi yerdə Azərbaycan Xalq Cümhuriyyətinin 100 illiyinə həsr edilmiş fotosərgi təşkil olunub. Sərgidə Azərbaycanın ilk İstiqlaliyyət Bəyannaməsi, AXC Hökumətinin 23 aylıq müddətdə gördüyü işlər, Əlimərdan bəy Topçubaşovun rəhbərlik etdiyi nümayəndə heyəti tərəfindən Azərbaycan Xalq Cümhuriyyətinin xəritəsi daxil olmaqla Paris Sülh Konfransına təqdim olunan tarixi sənədlər nümayiş etdirilib.
Tədbirin qonaqlarına Azərbaycan Xalq Cümhuriyyətinin 100 illiyinə həsr olunmuş “İrs-Heritage” jurnalının xüsusi buraxılışı, habelə Cümhuriyyətin əsas nailiyyətləri, Azərbaycanın dövlət müstəqilliyinin tanınması, dövlətçiliyin yaradılması, ordu quruculuğu, həmin dövrün şəxsiyyətləri barədə ətraflı məlumatlar təqdim olunub.
AXC-nin 100 illiyi münasibətilə səfirliyə Mərakeş xarici işlər və beynəlxalq əməkdaşlıq naziri N.Buritanın adından, o cümlədən ictimai təşkilatlardan və yerli ictimai xadimlərdən gül çələngləri və təbriklər daxil olub.
Dahi Azərbaycan bəstəkarları Üzeyir Hacıbəylinin Şərqdə ilk operası olan “Leyli və Məcnun” operası, Qara Qarayevin “Yeddi gözəl” baleti və Fikrət Əmirovun “Şur” simfonik muğamından musiqi parçaları qonaqların böyük marağına səbəb olub.
Tədbir ziyafətlə davam edib.