Azərbaycan Xalq Cümhuriyyətinin 100 illiyinə dəyərli töhfə
Bakı, 12 aprel, AZƏRTAC
Azərbaycan Milli Elmlər Akademiyasının (AMEA) Gəncə Bölməsinin Rəyasət Heyətinin növbəti iclası keçirilib.
AMEA-dan AZƏRTAC-a bildiriblər ki, tədbirdə bölmənin sədri, akademik Fuad Əliyev Prezident İlham Əliyevin 2018-ci ilin ölkəmizdə “Azərbaycan Xalq Cümhuriyyəti İli” elan edilməsi və “Azərbaycan Xalq Cümhuriyyətinin yaranmasının 100 illiyi” ilə bağlı imzaladığı sərəncamların əhəmiyyətindən danışıb.
F.Əliyev Azərbaycan Xalq Cümhuriyyətinin (AXC) 100 illiyi ilə əlaqədar bölmədə elmi konfrans və tədbirlərin keçiriləcəyini, bu istiqamətdə silsilə kitabların dərc olunacağını söyləyib.
Akademik yeni çapdan çıxan “Azərbaycan Xalq Cümhuriyyətinin Gəncədə qəbul etdiyi hüquqi aktlar və tarixinin izahlı xronologiyası (1918-1920)” kitabı haqqında məlumat verib. O, kitabda AXC-nin Gəncədə üçaylıq fəaliyyətinə dair maraqlı faktların yer aldığını, hüquqi aktlarla əlaqədar bu günədək məlum olmayan bir sıra məqamlara aydınlıq gətirildiyini diqqətə çatdırıb.
Sonra nəşrin tərtibçisi, tarix üzrə elmlər doktoru, professor Həsənbala Sadıqovun kitabla bağlı elmi məruzəsi dinlənilib. Bildirilib ki, vəsait Cümhuriyyətə dair arxiv sənədləri və dünyada nəşr olunan əsərlər əsasında tərtib edilib. O, bu həcmdə xronologiyanın ilk dəfə çap edildiyini, arxiv materiallarının tərcüməsi zamanı orijinallığın qorunub saxlanıldığını deyib.
Bölmənin digər xəbərləri
