Azərbaycan Xalq Cümhuriyyətinin yaradılması çoxəsrlik dövlətçilik tariximizin parlaq və şərəfli səhifələrindən biridir
Bakı, 26 may, AZƏRTAC
Mayın 26-da Milli-Qeyri Hökumət Təşkilatları Forumu (MQF) Azərbaycan İstiqlal Muzeyində “Azərbaycan Xalq Cumhuriyyəti-100 il” mövzusunda tədbir keçirib.
AZƏRTAC xəbər verir ki, tədbirdə çıxış edən Azərbaycan Milli Qeyri-Hökumət Təşkilatları Forumunun prezidenti Rauf Zeyni milli istiqlal tariximizin şərəfli səhifəsi olan Azərbaycan Xalq Cümhuriyyətinin yaranma tarixindən, qısa vaxt ərzində həyata keçirdiyi islahatlardan, ölkənin demokratikləşməsi və insan hüquqları sahəsində atılan addımlardan, dövlətçiliyimizin möhkəmləndirilməsindən, müstəqil respublikamızın uğurlarından danışıb. Bildirib ki, Azərbaycan Xalq Cümhuriyyətinin yaradılması çoxəsrlik dövlətçilik tariximizin parlaq və şərəfli səhifələrindən biridir. Şərqdə ilk demokratik institutlara malik olan Azərbaycan Xalq Cümhuriyyəti qısaömürlü olsa da, dahi lider Heydər Əliyevin qurduğu və Ulu Öndərin siyasi kursunun layiqli davamçısı Prezident İlham Əliyevin uğurla idarə etdiyi müasir müstəqil Azərbaycan Respublikası bu gün güclü ordu, güclü iqtisadiyyat və beynəlxalq əlaqələrə malik, firavan və sabit dövlətə çevrilib.
Milli Məclisin deputatı Fəzail İbrahimli Azərbaycan Xalq Cümhuriyyətinin müstəsna nailiyyətlərindən söz açıb. O, məhz Cümhuriyyətin yaradılması nəticəsində Azərbaycanın dünya xəritəsində bir reallığa çevrildiyini bildirib. Azərbaycan Milli Şurası tərəfindən 100 il əvvəl İstiqlal Bəyannaməsinin elan edilməsinin, Azərbaycan dövlətçiliyinin parlament demokratiyası formasında bərpasının tarixi hadisə olduğunu vurğulayan deputat bildirib ki, Azərbaycan Xalq Cümhuriyyəti etnik, dini, cinsi və sosial statusundan asılı olmayaraq hər bir vətəndaşının bütün mülki və siyasi hüquqlarını təmin edib. O vurğulayıb ki, müsəlman və türk dünyasında ilk dünyəvi və parlamentli respublika olan Azərbaycan Xalq Cümhuriyyəti qadınlara bərabər seçki hüququ verən birinci müsəlman çoxluqlu ölkə və bu meyar üzrə öndə gedən Avropa ölkələrindən biri olub. Azərbaycan Xalq Cümhuriyyətində yaşayan bütün millətlər həm hökumətdə, həm də 11 fraksiyada əhatə olunmuş 120 nəfərlik parlamentdə təmsil olunub, mövcud olduğu iki il ərzində parlament 230 qanun qəbul edib.
Qeyd olunub ki, bolşeviklər tərəfindən devrilməsinə baxmayaraq, xalqın istiqlal əzmi yenilməyib və 1991-ci ildə sovet imperiyasının dağılması ilə Azərbaycan yenidən dövlət müstəqilliyini bərpa edib. Azərbaycan Respublikasının müstəqilliyin ilk illərində böyük təhlükə ilə üzləşdiyini xatırladan F.İbrahimli dahi şəxsiyyət, ulu öndər Heydər Əliyevin siyasi hakimiyyətə qayıdışı ilə ölkəmizin sabit inkişaf yoluna qədəm qoyduğunu vurğulayıb.
Milli Məclisin deputatı İlham Məmmədov Cümhuriyyətimizin yaranma tarixindən, mövcud olduğu qısa dövr ərzində keçdiyi inkişaf yolundan və həmin dövr ərzində əldə olunmuş nailiyyətlərdən danışıb. O vurğulayıb ki, ümummilli liderimiz Heydər Əliyevin qurub-yaratdığı, müstəqilliyə qovuşdurduğu Azərbaycan Respublikası hazırda Prezident İlham Əliyevin rəhbərliyi ilə sürətlə inkişaf edir, qarşıya qoyulan hədəflərə doğru inamla irəliləyir, ümumbəşəri dəyərlərə əsaslanan mütərəqqi inkişaf kursu seçməklə demokratikləşmə, insan hüquq və azadlıqlarının təminatı sahəsində parlaq nailiyyətlərə imza atır.
Ədliyyə Nazirliyinin insan hüquqları və ictimaiyyətlə əlaqələr idarəsinin rəis müavini Teymur Məlik-Aslanov, Mirzə Ələkbər Sabir Fondunun prezidenti Sevda Tahirli və digərləri Prezident İlham Əliyevin rəhbərliyi ilə bu gün özünün ən qüdrətli dövrünü yaşayan, bölgədə söz, dünyada nüfuz sahibinə çevrilən dövlətimizin Azərbaycan Xalq Cümhuriyyətinin ənənələrini, müstəqillik, suverenlik, demokratik ideallarını və prinsiplərini layiqincə davam etdirdiyini vurğulayıblar.
Bölmənin digər xəbərləri
