Azərbaycan xalqı şəhidlik zirvəsinə ucalmış qəhrəman övladları ilə fəxr edir
Bakı, 18 yanvar, AZƏRTAC
1990-cı ilin 20 yanvar günü Azərbaycan xalqının tarixinə Qanlı Yanvar faciəsi kimi daxil olub. 20 Yanvar faciəsi insanlığa qarşı yönəldilmiş ən ağır cinayətlərdən biridir. 1990-cı il yanvarın 19-dan 20-nə keçən gecə sovet ordusu Bakıya əksəriyyəti ermənilərdən ibarət olan qoşun yeritdilər. Hadisə nəticəsində 147 nəfər mülki şəxs qətlə yetirildi, 700-dən çox insan yaralandı, yüzlərlə adam itkin düşdü. Vəhşicəsinə öldürülənlər arasında 20-dən çox qadın və uşaq vardı.
AZƏRTAC xəbər verir ki, Şuşa Rayon İcra Hakimiyyəti tərəfindən 20 Yanvar şəhidlərinin xatirəsinə həsr edilmiş silsilə tədbirlər təşkil olunur.
Yanvarın 18-də Şuşa Rayon İcra Hakimiyyətinin və Şuşa Dövlət Musiqili Dram Teatrının birgə təşkilatçılığı ilə şəhər 1 nömrəli tam orta məktəbdə 20 Yanvar şəhidlərinin xatirəsinə həsr olunmuş anım mərasimi keçirilib.
Əvvəlcə torpaqlarımızın ərazi bütövlüyü uğrunda döyüşlərdə şəhid olmuş Vətən övladlarının xatirəsi bir dəqiqəlik sükutla yad edilib.
Rayon icra hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” idarə heyətinin sədri - icmanın rəhbəri Bayram Səfərov çıxışında ümummilli lider Heydər Əliyevin sovet imperiyasının bu vəhşiliyinə Moskvada öz etirazını bildirməsindən, onun ikinci dəfə hakimiyyətə qayıdışından sonra 20 Yanvar faciəsinə hüquqi qiymətin verilməsindən danışıb. Bildirilib ki, Şəhidlər xiyabanında Azərbaycanın azadlığı uğrunda mübarizədə canlarından keçmiş insanların xatirəsinə ucaldılmış möhtəşəm “Əbədi məşəl” abidə kompleksi də ümummilli lider Heydər Əliyevin təşəbbüsü ilə inşa edilib. Heydər Əliyevin 2000-ci il yanvarın 17-də imzaladığı Fərmanla 1990-cı il 20 yanvar faciəsi zamanı şəhid olanlara “20 Yanvar şəhidi” fəxri adı verilib.
Bayram Səfərov deyib: “Biz Vətənimizin, xalqımızın azadlığı və suverenliyi uğrunda canlarını qurban verərək şəhidlik zirvəsinə ucalmış qəhrəman övladlarımızla fəxr edirik. Nə qədər ki, müstəqil Azərbaycan dövləti var, şəhidlərimiz xalqımızın qəlbində əbədi yaşayacaq. Azərbaycan Respublikasının Birinci vitse-prezidenti Mehriban Əliyeva 20 Yanvar şəhidlərinin ailələrinə və əlillərinin problemlərinə daim böyük qayğı ilə yanaşır. Heydər Əliyev Fondunun dəstəyi ilə 20 Yanvar şəhidlərinin xatirəsinin əbədiləşdirilməsi, faciə qurbanları ailələrinin problemlərinin həlli, əlillərin sağlamlıqlarının bərpası istiqamətində mühüm işlər görülür. Heydər Əliyev Fondunun vitse-prezidenti, Rusiyanın Azərbaycanlı Gənclər Təşkilatının sədri Leyla Əliyevanın bu istiqamətdə həyata keçirdiyi tədbirlər də yüksək qiymətləndirilir. Məhz onun təşəbbüsü ilə Heydər Əliyev Fondu tərəfindən Qarabağ münaqişəsi, xalqımızın qanlı tarixi - 20 Yanvarla bağlı kitablar, bukletlər, albomlar nəşr olunub, filmlər çəkilib”.
Diqqətə çatdırılıb ki, Azərbaycan dövlətini və Prezidentini, hər bir vətəndaşımızı hazırda narahat edən ən vacib məsələ Ermənistan-Azərbaycan, Dağlıq Qarabağ münaqişəsidir. 1988-ci ildən başlayaraq Ermənistanın Azərbaycana qarşı apardığı işğalçılıq siyasəti nəticəsində torpaqlarımızın 20 faizi Ermənistan silahlı qüvvələri tərəfindən zəbt edilib. İndiyədək Ermənistan rəhbərliyinin qeyri-konstruktiv mövqedən çıxış etməsi Qarabağ müharibəsinin sülh yolu ilə həllinə mane olur. Ancaq Prezident İlham Əliyev Qarabağ problemini sülh yolu ilə və beynəlxalq hüquq normaları çərçivəsində həll etməyə səy göstərir. Eyni zamanda, dövlətimizin başçısı Qarabağ münaqişəsi ilə bağlı keçirdiyi bütün görüşlərdə Azərbaycanın mövqeyinin dəyişməz olduğunu bəyan edərək bildirib ki, ölkəmizin ərazi bütövlüyü danışıqlar mövzusu ola bilməz. Azərbaycan bütün vasitələrdən istifadə edərək torpaqlarını işğaldan azad edəcək. Bu, Azərbaycan dövlətinin, xalqının, Prezident İlham Əliyevin qəti və dəyişməz mövqeyidir. Prezident, Silahlı Qüvvələrin Ali Baş Komandanı İlham Əliyevin rəhbərliyi ilə torpaqlarımızın işğaldan azad olunacağı gün uzaqda deyil.
Milli Məclisin deputatı Elman Məmmədov, 20 Yanvar əlili Asif İbrahimov çıxışlarında həmin gün xalqımıza qarşı törədilən ağır faciədən söz açıb, belə tədbirlərin yeniyetmə və gənclərin hərbi-vətənpərvərlik tərbiyəsinin gücləndirilməsi sahəsində mühüm əhəmiyyətindən danışıblar.
Sonra Şuşa Dövlət Musiqili Dram Teatrının aktyorlarının ifasında 20 Yanvar faciəsinə həsr olunmuş ədəbi-bədii kompozisiya nümayiş etdirilib.
Bölmənin digər xəbərləri
