Azərbaycanda cüdo məşqçiliyi inkişaf etdirilir
Bakı, 22 yanvar, AZƏRTAC
Azərbaycan Cüdo Federasiyası (ACF) Dan dərəcələrinin verilməsinə həsr olunmuş seminar və imtahan təşkil edib.
ACF-dən AZƏRTAC-a verilən məlumata görə, ölkədə bir ilk olan bu təşəbbüs Azərbaycanda cüdo məşqçiliyinin gələcəyinin formalaşmasında mühüm əhəmiyyət kəsb edir.
Seminarın əsas məqsədi Dan sisteminə uyğun olaraq, məşqçilərin bacarıqlarını qiymətləndirmək və müəyyən etməkdir. Həmçinin Dan dərəcələri üzrə seminarın və imtahanın keçirilməsi məşqçilərin motivasiyasına müsbət təsir göstərəcək, onların peşəkar bacarıqlarını daim artırmağa həvəsləndirəcək.
Seminar və imtahanı uğurla başa vurduqdan sonra iştirakçılara müvafiq Dan dərəcəsi üzrə bilik və bacarıqlarını təsdiq edən sertifikat veriləcək.
Qeyd edək ki, Türkiyə Cüdo Federasiyasının Təhsil Direktoru, Avropa Cüdo Birliyinin Kata Komissiyasının üzvü Mehmet Yılmaz tərəfindən aparılan seminarda 50 cüdo məşqçisi iştirak edir.
Bölmənin digər xəbərləri
