Azərbaycanda ən çox qar Quba rayonuna yağmışdır
Bakı, 13 dekabr (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti dekabrın 12-si gün ərzində, 13-ü səhərədək ölkə ərazisində müşahidə olunmuş hava şəraiti haqqında məlumat yaymışdır.
Nazirliyin mətbuat xidmətindən AZƏRTAC-a bildirmişlər ki, dekabrın 12-si gün ərzində, 13-ü səhərədək güclü şimal-qərb küləyi əsmiş, qar yağmış, yağıntı bəzi yerlərdə aramsız olmuşdur.
Qar örtüyünün hündürlüyü Bakıda 4, Qonaqkənd və Xaltanda (Quba) 65-75, Xınalıqda 58, Rvarudda 54, Altıağacda 45, Lerikdə 41, Kəlvəzdə 36, İsmayıllıda 31, Yardımlıda 30, Gədəbəydə 27, Ağdərədə 26, Qəbələdə 22, Sarıbaş, Daşkəsəndə 20, Göygöldə 14, Oğuzda 13, Zərdab, Naxçıvanda 11, Şərur, Şahbuz, İmişli, Salyan, Göytəpə, Şəkidə 10, Biləsuvarda 9, Göyçayda 8, Sabirabad, Zaqatala, Ağsu, Şamaxıda 6, Naftalan, Lənkəranda 5, Bərdə, Tərtərdə 3, Mingəçevir, Kürdəmir, Cəfərxan, Xaçmaz, Neftçalada 2, Gəncə, Tovuzda 1 santimetr təşkil etmişdir.
Dekabrın 12-si gün ərzində şimal-qərb küləyi Şamaxıda 30, Neftçalada 26, Ağdərədə 20, Altıağac, Lənkəranda 17, Abşeron yarımadasında və Abşeron dəniz rayonunda 25-27 metr/saniyə, bəzi yerlərdə 30 metr/sanyəyədək güclənmiş, Neft Daşları stansiyasının məlumatına əsasən dənizdə dalğanın hündürlüyü 4.0 metrə çatmışdır.
Bölmənin digər xəbərləri
