Azərbaycanda incəsənət təhsili yenilənir: gənclər yeni yaradıcılıq istiqamətlərinə yönəlir VİDEO
Bakı, 28 oktyabr, AZƏRTAC
Azərbaycanda incəsənət təhsilinin modernləşdirilməsi, milli mədəni irsin qorunması və gənclər üçün yeni yaradıcılıq imkanlarının yaradılması istiqamətində işlər görülür.
AZƏRTAC xəbər verir ki, bunu Azərbaycan Respublikasının mədəniyyət nazirinin müşaviri, fəlsəfə doktoru, dosent Cəsarət Valehov “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumu çərçivəsində keçirilən “Mədəniyyətlərarası dialoq, təhsil və rəqəmsal transformasiya” adlı sessiyanın ikinci panelində çıxışı zamanı deyib. O bildirib ki, müasir yaradıcılıq sahələrinə marağın artması elektron musiqi, qrafik dizayn və geyim dizaynı kimi istiqamətlərin tədrisinə diqqəti artırır. Əsas məqsəd gənclərin həm milli mədəni köklərini tanıması, həm də gələcəyin yaradıcı iqtisadiyyatı üçün zəruri bacarıqlar qazanmasıdır.
C.Valehov qeyd edib ki, Xankəndi, Cəbrayıl, Şuşa, Laçın, Kəlbəcər, Füzuli və digər ərazilərdə incəsənət təhsili müəssisələrinin bərpası yalnız təhsil deyil, həm də sosial inteqrasiya baxımından əhəmiyyətlidir. İncəsənət təhsili doğma yurda qayıdan uşaqlarda özünəinam və aidiyyət hissinin güclənməsinə, emosional rifahının və həyat keyfiyyətinin yaxşılaşmasına kömək edə bilər.
“Bu ərazilərdə incəsənət təhsil müəssisələrinin bərpası və inkişafı təkcə təhsil layihəsi deyil, həm də insan layihəsidir. Ailələr doğma yurdlarına qayıdanda uşaqların yalnız məktəb binalarına və sinif otaqlarına deyil, həm də görüşmək, yaradıcılıqla məşğul olmaq, özlərini ifadə etmək və aidiyyət hissini yaşamaq üçün məkanlara ehtiyacı var”, - deyə C.Valehov bildirib.
Bölmənin digər xəbərləri
