Azərbaycanda mədəniyyətlərarası dialoqun təşviqi qlobal sülhə töhfə verən humanitar missiyadır - RƏY
Bakı, 17 noyabr, Günel Türksoy, AZƏRTAC
Tarixən müxtəlif mədəniyyətlərin və dinlərin qovuşduğu məkan olan Azərbaycan bu gün də tolerantlıq və birgəyaşayış nümunəsi kimi dünya ictimaiyyətinin diqqətini cəlb edir. Azərbaycanda mədəniyyətlərarası və dinlərarası dialoqun təşviqi dövlət siyasətinin əsas istiqamətlərindən biri kimi uzun illərdir sistemli şəkildə həyata keçirilir. Ölkədə bu sahədə aparılan dövlət siyasəti həm hüquqi baza, həm institusional yanaşma, həm də praktiki layihələr üzərində qurulub.
Bu fikirləri AZƏRTAC-a açıqlamasında Bakı Beynəlxalq Multikulturalizm Mərkəzinin Analitika şöbəsinin müdiri, fəlsəfə doktoru Rəşad İlyasov deyib.
O bildirib ki, dövlət səviyyəsində görülən tədbirlər sayəsində Azərbaycan həm ölkə daxilində, həm də beynəlxalq arenada mədəniyyətlərarası və dinlərarası dialoqun etibarlı tərəfdaşı kimi tanınır: “Bu siyasət ölkədə stabil tolerantlıq mühitinin qorunmasına, sosial həmrəyliyin möhkəmlənməsinə və müxtəlif xalqların, dinlərin nümayəndələrinin harmoniyalı şəkildə bir arada yaşamasına təminat yaradır. Azərbaycan Konstitusiyası bütün vətəndaşlara dinindən, dilindən, irqindən və etnik mənsubiyyətindən asılı olmayaraq bərabər hüquqlar verir. Bununla yanaşı, dövlət tərəfindən mədəni müxtəlifliyin qorunmasını və dini icmalar arasında dialoqu təşviq edən geniş mexanizmlər formalaşdırılıb”.
Azərbaycanda dini konfessiyaların azad və təhlükəsiz fəaliyyəti
Şöbə müdiri qeyd edib ki, Azərbaycanda yaşayan müxtəlif dini konfessiyaların azad və təhlükəsiz fəaliyyəti dövlət tərəfindən təmin olunur: “Son illər ölkədə bir sıra kilsə, sinaqoq və məscidlərin bərpası və yenidən qurulması həyata keçirilib. Dağ yəhudiləri, Alban-Udi dini icması, pravoslav, katolik və digər icmaların mədəni və dini fəaliyyətlərinə dövlət tərəfindən davamlı dəstək göstərilir. Bu addımlar müxtəlif dini icmalar arasında etimadı artırır, cəmiyyətdə birgəyaşayış mədəniyyətinin güclənməsinə xidmət edir”.
R.İlyasov bildirib ki, Azərbaycanda dini müxtəlifliyə verilən yüksək dəyərin daha bir mühüm nümunəsi ölkəmizdə Amerika Birləşmiş Ştatlarında mənzillənən İsa Məsihin Sonuncu Gün Müqəddəsləri Kilsəsinin rəsmi qaydada qeydiyyata alınması və Bakı ofisinin fəaliyyətə başlamasıdır. Bu addım kilsənin ölkədə qanunvericilik çərçivəsində sərbəst fəaliyyət göstərməsini təmin edir və Azərbaycan dövlətinin dini azadlıqlara, müxtəlif konfessiyalara bərabər münasibətinə sadiqliyini göstərir, eyni zamanda, Azərbaycanın multikultural və tolerant cəmiyyət modelinin praktik təsdiqi kimi dəyərləndirilir. Müxtəlif konfessiyaların, o cümlədən, xristianlığın müxtəlif qollarının ölkədə sərbəst fəaliyyət göstərməsi Azərbaycan dövlətinin dini plüralizmi qorumaq və dini azadlıqları təmin etmək sahəsində ardıcıl və prinsipial siyasət apardığını bir daha sübut edir.
Multikultural dəyərlərin dövlət səviyyəsində dəstəklənməsi
Fəlsəfə doktoru vurğulayıb ki, Azərbaycanda tolerantlıq mühitinin qorunub saxlanılması müxtəlif etnik və dini icmalar arasında qarşılıqlı hörmətin və etimad münasibətlərinin möhkəmlənməsinə imkan yaradır: “Multikultural dəyərlərin dövlət səviyyəsində dəstəklənməsi radikalizmin, dini ekstremizmin və nifrətin qarşısının alınmasında əhəmiyyətli rol oynayır. Azərbaycanda mədəniyyətlərarası və dinlərarası dialoqun təşviqi yalnız daxili sabitliyə deyil, həm də qlobal sülh və əməkdaşlıq proseslərinə töhfə verən mühüm humanitar missiyadır. Bu istiqamətdə aparılan ardıcıl siyasət nəticəsində bu gün Azərbaycan modeli dünyada nümunə kimi qəbul edilir”, - deyə R.İlyasov bildirib.
Bölmənin digər xəbərləri
