Azərbaycanda oynamış legioner: Məncə, Macarıstan yığması bu matçda qələbə qazanacaq
Bakı, 10 iyun, AZƏRTAC
Məncə, Macarıstan yığması bu matçda qələbə qazanacaq.
AZƏRTAC xəbər verir ki, bu sözləri vaxtilə “Neftçi”də oynamış macarıstanlı futbolçu Mark Tamaş ölkəsinin bu gün Azərbaycanla keçirəcəyi yoldaşlıq oyunu ilə bağlı danışarkən deyib.
O, oyunun heç də asan olmayacağını bildirib: “Yenə də seçmə mərhələyə yaxşı hazırlaşmaq baxımından Macarıstan millisi bu görüşdə qələbə qazanmalıdır. Baş məşqçi məhz belə qarşılaşmalarda nəyin yolunda getdiyini, nəyin düzgün edilmədiyini görə bilər. Çünki məşqçilər yoldaşlıq görüşlərində müxtəlif taktikanı, eləcə də, yeni oyunçuları sınaya bilirlər. Azərbaycanla oyun da qarşıdakı rəsmi matçlar öncəsi bəzi məqamları yoxlamaq baxımından yaxşı fürsətdir”.
M.Tamaş Azərbaycan yığmasının güclü və zəif tərəfləri barədə də danışıb: “Millinizin əksər oyunçuları daxili çempionatda çıxış edir və demək olar ki, eyni komandada oynayırlar. Belə də futbolçular bir-birilərini daha yaxşı tanıyırlar. Bu da Azərbaycan millisinin əsas üstünlüyüdür”.
Qeyd edək ki, “Liv Bona Dea Arena”da təşkil olunacaq matç saat 20:00-da başlayacaq.
Bölmənin digər xəbərləri
