AZƏRBAYCANDA QUŞ OVUNAQADAĞA QOYULMUŞDUR

11.10.2005 [21:27]
Çap et
A⁺ A^-

Ekologiya və Təbii Sərvətlər Nazirliyi cari ov mövsümündə quşların ovlanmasına bir aylıq qadağa qoymuşdur. Nazirliyin mətbuat xidmətindən AZƏRTAC-ın müxbirinə bildirmişlər ki, bu tədbir Rusiyada və Qazaxıstanda quş qripinin yayılması və köçəri quşların Azərbaycan ərazisində kütləvi miqrasiyası yerlərində onlardan təsadüfi seçim yolu ilə qan götürülməsi vasitəsilə seromonitorinqin keçirilməsinin zəruriliyi ilə əlaqədar görülmüşdür. Tədqiqatları Kənd Təsərrüfatı Nazirliyi baytarlıq laboratoriyasının mütəxəssisləri aparacaqlar.

Nazirliyin müvafiq qurumlarına tapşırılmışdır ki, əhali arasında izahat işləri aparılmasını, quşların, (o cümlədən onların kütləvi miqrasiyası yerlərində) qanunsuz quş ovu ilə mübarizə tədbirlərinin gücləndirilməsini təmin etsinlər.

Ekologiya və Təbii Sərvətlər Nazirliyi daxili işlər və vergilər nazirliklərinə qanunsuz ovlanmış quşların satışına yol verilməməsi üçün tədbirlər görülməsi barədə rəsmi müraciət də qəbul etmişdir.

Nazirlik quşların ovlanmasına qoyulmuş qadağanın ləğv edilməsi məsələsini seromonitorinqin nəticələrindən asılı olaraq nəzərdən keçirəcəkdir.