AZƏRBAYCANIN BƏDİİ GİMNASTİKA ÜZRƏ YIĞMA KOMANDASI AVROPA ÇEMPİONATININ GÜMÜŞ MEDALINI QAZANMIŞDIR
Bakı, 16 may (AZƏRTAC). Azərbaycanın bədii gimnastika üzrə yığma komandası Bakıda keçirilən 25-ci Avropa çempionatının gümüş medalına sahib olmuşdur.
Aliyə Qarayeva və Anna Qurbanovanın iki gün ərzində ip, halqa, top və lentlə çıxışlarının cəmində 212,850 xal toplamış Azərbaycan yığması qitə çempionatında ikinci yeri tutmuşdur. Avropa çempionu tituluna isə Rusiya yığması sahib çıxmışdır. Rusiya millisi 224,325 xalla birinci olmuşdur. Bürünc medallara isə 209,700 xal toplamış Ukrayna millisi layiq görülmüşdür.
Qaliblərə medalları Azərbaycan Gimnastika Federasiyasının vitse-prezidenti Altay Həsənov və Avropa Gimnastika İttifaqının prezidenti Dimitrios Dimitropulos təqdim etmişlər.
Yarışın ikinci günü həm Aliyə Qarayeva, həm də Anna Qurbanova xoş təsir bağışlayaraq hakimlərdən kifayət qədər yüksək xallar almışlar.
Ümumilikdə dörd hərəkətin cəmində Anna Qurbanova 80,675 xal toplayaraq dördüncü, Aliyə Qarayeva isə 80,375 xalla beşinci olmuşdur.
Bu nəticə ilə ilk səkkizliyə düşən gimnastlarımız mayın 17-də ip, top, halqa və lentlərlə fərdi hərəkətlərin final yarışlarında mübarizə aparmaq hüququ qazanmışlar.
Xatırladaq ki, mayın 16-da Azərbaycanın yeniyetmlərdən ibarət qrup hərəkətləri komandası da Avropa çempionatının finalına yüksəlmişdir. Komandaların yalnız 5 lentlə keçirilən mübarizəsində millimiz Rusiya, Bolqarıstan, İspaniya, İsrail, Belarus, Macarıstan və Polşa yığmaları ilə birgə yarışacaqdır.
######
 |
 |
 |
Bölmənin digər xəbərləri
