SİYASƏT
Azərbaycanın bədii özfəaliyyət ansamblı Murmanskda xeyriyyə marafonunda iştirak etmişdir
Bakı, 11 aprel (AZƏRTAC). Murmansk vilayətində “Göy qurşağı hər bir evdə” xeyriyyə marafonu start götürmüşdür. “Raduqa” ictimai təşkilatı Ümumrusiya Xalq Cəbhəsinin regional şöbəsi ilə birlikdə şimallıları əlillər və çoxuşaqlı ailələr üçün vəsait toplamağa çağırmışdır. Onlar üçün təkcə pul deyil, həm də ərzaq məhsulları, gigiyena əşyaları, uşaq yeməkləri, məişət texnikası yığılacaqdır.
“Raduqa” təşkilatı əlillər və çoxuşaqlı ailələr üçün muzeylərə və uşaqların əl işlərindən ibarət sərgiyə ekskursiya təşkil etmişdir. Murmansk vilayətinin milli mədəniyyət birliklərinin nəzdində fəaliyyət göstərən Azərbaycan, gürcü, Belarus, çuvaş və Ukrayna milli bədii özfəaliyyət ansamblları xeyriyyə tədbirində çıxış etmişlər.
Marafona Murmansk şəhər yerli Sovetinin və vilayət Dumasının deputatları, regionun İctimai palatasının üzvləri, sosial təminat orqanlarının işçiləri dəvət olunmuşdular.
“Raduqa” təşkilatının sədri Rita Əbdürrəhmanova jurnalistlərlə müsahibəsində bildirmişdir ki, çoxuşaqlı ailələr maddi çətinliklərlə üzləşirlər. Təşkilatın başçısı demişdir: “Buna görə də biz “Göy qurşağı hər bir evdə” marafonunu təşkil etməyi qərara aldıq. Qoy hər bir ailədə məhəbbət və sevinc dolu göy qurşağı şəfəq saçsın”.