Azərbaycanın çağdaş tarixinin böyük bir dövrü Ulu Öndərin adı ilə bağlıdır
Qax, 10 may, Mustafa Dadaşov, AZƏRTAC
XX əsr bəşəriyyətə çox görkəmli dövlət xadimləri, müdrik rəhbərlər, bacarıqlı dövlət başçıları bəxş edib. Belə dahi şəxsiyyətlərdən biri də Azərbaycan xalqının böyük oğlu, Ümummilli Lider Heydər Əliyevdir. Azərbaycanın çağdaş tarixinin böyük bir dövrü Ulu Öndərin adı ilə bağlıdır. Bu dahi şəxsiyyətin səyi və uzaqgörən siyasəti nəticəsində Azərbaycan dönməz müstəqilliyə, inkişafa, tərəqqiyə qədəm qoyub.
AZƏRTAC-ın bölgə müxbiri xəbər verir ki, bu fikirlər Ulu Öndərin anadan olmasının 102-ci ildönümü münasibətilə mayın 10-da Qax rayon Heydər Əliyev Mərkəzində keçirilən tədbirdə səsləndirilib.
Rayon rəhbərliyi və ictimaiyyətin nümayəndələri əvvəlcə Ümummilli Lider Heydər Əliyevin abidəsini ziyarət edib, önünə gül dəstələri düzüblər.
Tədbirin əvvəlində Dövlət Himni səsləndirilib, Ulu Öndərin xatirəsi bir dəqiqəlik sükutla yad edilib.
Tədbirdə rayon icra hakimiyyəti başçısının birinci müavini Elbrus Tağıyev bütün həyatını və fəaliyyətini öz xalqının xoşbəxtliyinə həsr etmiş Ümummilli Liderin Azərbaycanın inkişafı və tərəqqisi naminə misilsiz xidmətlərindən danışıb. Vurğulanıb ki, dünya səviyyəli siyasi xadim Heydər Əliyev çoxəsrlik dövlətçilik tariximizdə yeni parlaq səhifə açan nadir, bənzərsiz şəxsiyyətdir.
Rayon icra hakimiyyəti başçısının müavini – İctimai-siyasi və humanitar məsələlər şöbəsinin müdiri Vəfa Heydərova məruzəsində bildirib ki, Azərbaycan xalqı bütünlüklə özünü xoşbəxt saya bilər, çünki onun XX əsrin son 30 ilinə və XXI əsrin əvvəlinə təsadüf edən tarixi və taleyi Ümummilli Lider Heydər Əliyev şəxsiyyəti və onun əzəmətli ideyaları üzərində qərar tutur. Bütün həyatını xalqının xoşbəxt gələcəyinə, qüdrətli Azərbaycan dövlətinin yaradılmasına və inkişafına həsr etmiş bu dahi şəxsiyyətin Vətən və xalq qarşısındakı xidmətləri misilsizdir.
Vurğulanıb ki, Heydər Əliyev təkcə Azərbaycanın deyil, dünyanın ən görkəmli siyasətçilərindən biri olub. Müstəqil Azərbaycan Ulu Öndər Heydər Əliyevin möhkəm təməl üzərində ucaltdığı əzəmətli abidədir. Ümummilli Liderin yenidən hakimiyyətə gəlişi ilə ölkəmizdə əmin-amanlıq, sakitlik yaranıb, hərc-mərcliyə son qoyulub, Azərbaycanda quruculuq mərhələsi başlayıb.
Tədbirdə digər çıxış edənlər də dahi rəhbərin həyat və fəaliyyətinin ən önəmli məqamlarından bəhs ediblər. Çıxışlarda qeyd olunub ki, müasir Azərbaycan tarixinin yaradıcısı olan Heydər Əliyev xalqımızın qürur mənbəyi, tarixi bir şəxsiyyət olaraq yaddaşlara əbədi həkk olunub. Harada olmasından asılı olmayaraq, dünyanın istənilən yerində hər bir azərbaycanlı Heydər Əliyev şəxsiyyətini əziz xatirə kimi daim yad edir.
Çıxışlardan sonra YAP sıralarına yeni daxil olan üzvlərə vəsiqələr təqdim edilib.
Tədbir bədii proqramla başa çatıb.
Bölmənin digər xəbərləri
